РФ юстициятын миниистирэ Константин Чуйченко Арассыыйа састаабыгар сылтан эрэ ордук кэм анараа ѳттүгэр саҥа киирбит Донецкай уонна Луганскай Норуодунай Ѳрѳспүүбүлүкэлэрин, Херсонскай уонна Запорожскай уобаластары Арассыыйа сокуоннарын эйгэтигэр түргэнник уонна тѳhѳ кыалларынан биир тэҥник киллэрэр наадатын туhунан эттэ. Онуоха кини саҥа эрэгийиэннэр олохтоохторун дойду правовой систиэмэтигэр кѳhѳрүү муҥутуур судургу буолуохтааҕын бэлиэтээтэ.
Арассыыйа правовой систиэмэтигэр саҥа эрэгийиэннэри киллэриигэ туhуламмыт 50-тан тахса федеральнай сокуон хайыы үйэ ылыллыбыт. Юстиция министиэристибэтин эрэгийиэннээҕи нормативнай аакталарын федеральнай регистрыгар саҥа эрэгийиэннэр 1730 үлэлии турар аакталара киирбиттэр.
Юстиция министиэристибэтэ саҥа субъектар аhаҕас былаастарын, ол иhигэр муниципальнай салайыы уорганнарын тэрийэргэ наадалаах нормативнай правовой баазаны оҥоророго актыыбынайдык үлэлэhэр. Ол курдук, юстиция министиэристибэтэ үлэлии турар Донецкай уонна Луганскай Норуодунай Ѳрѳспүүбүлүкэлэр Конституцияларын, Херсонскай уонна Запорожскай уобаластар Устааптарын оҥорорго кѳмѳлѳспүт.
Бырабыыталыстыба чааhын кэмигэр Госдума дьокутааттара РФ юстициятын миниистиригэр Константин Чуйченкоҕа ыйытыылары биэрдилэр. Ону кытта бэбиэскэ тиэмэтинэн кэмитиэттэр бэрэссэдээтэллэрэ, фракциялар бэрэстэбиитэллэрэ тыл эттилэр.
Госдума хонтуруолга кэмитиэтин бэрэссэдээтэлэ Олег Морозов саҥа эрэгийиэннэр Арассыыйа правовой систиэмэтигэр кѳhүүлэрин болдьоҕо 2026 сыл тохсунньу 1 күнүнэн олохтоммутун, интеграция муҥутаан 2028 сыл тохсунньу 1 күнүгэр диэри ыытылларын туhунан эттэ.
Госдума судаарыстыбаннай тутулга уонна сокуоҥҥа кэмитиэтин бэрэссэдээтэлэ Павел Крашенинников бу үлэ барыта саҥа эрэгийиэннэр интэриэстэрин учуоттаан оҥоhуллуохтаах диэн бэлиэтээтэ.
Ил Түмэн пресс-сулууспата
- 0
- 0
- 0
- 0
- 0
- 0