Олохтоох салайыныы туһунан сокуон барыла 2022 сыл тохсунньу 25 күнүгэр дойду парламенын дьокутааттарын көрүүтүгэр киирэн, бастакы ааҕыыны ааспыта, ол кэннэ тохтоон турбута. Билигин ол хаттаан сөргүтүллэн, Госдуума Судаарыстыба тутулугар кэмитиэтигэр эбиилэри, көннөрүүлэри киллэрии уонна дьүүллэһии саҕаланна. Ол түмүгүнэн көрөн, алтынньы 22 күнүгэр дьокутааттар иккис ааҕыыларыгар киириэхтээх диэн кэмитиэт быһаарыытын Госдуума сэбиэтэ балаҕан ыйын 24 күнүгэр өйөөтө. Биллэрин курдук, олохтоох салайыныы икки таһымнаахтан биир таһымҥа көһүүтэ дойду олоҕор сүдү суолталаах уларыйыыны таһаарара күүтүллэр.
Кэмитиэт бэрэссэдээтэлэ уонна бу сокуон барылын оҥорооччу Павел Крашенинников кэмитиэт мунньаҕар: “Сокуон барыла олус улахан, билигин аҥаардас 744 көннөрүү кирэн турар. Барылы бэлэмнээһин бара турар, онон сэтинньи бүтүүтэ-ахсынньы саҥатыгар бу сокуону иккис, үһүс ааҕыы түмүгүнэн ылыныахтаахпыт, ”- диэн иһитиннэрдэ. Салгыы кини, бу сокуон киирэр кэмигэр саҥа уларыытылары туттууга бэрт уһун кэмнээх көһүү балаһыанньата сабаҕаланарын бэлиэтээн: “Элбэх эрэгийиэнтэн ыйытыы, туруорсуу киирэр. Биһиги быыбардаммыт уорганнар болдьоммут кэмнэригэр бары боломуочуйаларын толорон баран тохтуур бириинсибин тутуһарга дьулуһабыт”, -диэн дойду олохтоох салайыныы уорганнарын кыһалҕаларын таарыйар боппуруоһу чопчулаан быһаарар. Онон сирдэттэххэ, олохтоох салайыныы бары уорганнара болдьохторун толору үлэлээн баран тохтуохтарын сөп. Ол гынан баран бүтэһигэр, тохтототорго төрүөт баар эр буоллаҕына, булгуччута суох диэн чопчулаан ыйбыттар.
Олохтоох салайыныы тиһигэ биир таһымҥа көһүүтэ дойдуга былаас тэрээһинигэр балайда улахан уларытыылары киллэрэрэ сабаҕаланар. Ол курдук, былаас араас таһымнарын икки ардыларыгар боломуочуйалары тыырсыыны тэҥэ, уларыта тутуу биир саҥа көрүҥүнэн олохтоох салайыныы икки таһымтан булгуччу биир таһымнаахха көһүүтэ буолуоҕа.
Сокуон барылын кэнсиэпсийэтинэн, 2028 сылга диэри бары тыа уонна куорат поселениелара муниципальнай оройуоҥҥа, эбэтэр куорат уокуругар холбонуохтаахтар. Кинилэр сэбиэттэрэ уонна дьаһалталара тохтуохтаахтар. Сокуон барылын быһыытынан, эрэгийиэн баһылыктара муниципалитеттар баһылыктарын анааһыҥҥа кыттыһыахтарын сөп, ону таһынан кинилэри дуоһунастарыттан тохтототор бырааптаналлар. Холобура, хас да төгүллээн KPI ситиһиилэрэ мөлтөх буоллаҕына.
Крашенинников бэлиэтииринэн, билигин сокуон барылын эрэгийиэннэри кытары дьүүллэһии былааннанар: «Салгыы өссө төһө көннөрүү киирэринэн көрөммүт, хас кэмитиэтинэн аттаран дьүүллэһэрбитин быһаарыахпыт. Бука, кэмитиэккэ хас да мунньаҕы ыытаммыт, көрүөхпүт».
Кини этэринэн, биир таһымнаах олохтоох салайыныыга киирии – биир саамай сүрүн нуорма: “Сокуон барылын бу чааһыгар уларытыы киллэриллэрэ былааннаммат. Сорох көннөрүүлэр билигин үлэлии турар "Олохтоох салайыныы туһунан" сокуоҥҥа номнуо киллэриллэн дьайаллар, онон салгыы анаалыстаан көрүөхпүт.
Сокуон толору күүһүгэр киириитэ икки-үс сыл устата “Кирилиэс” бириинсибинэн ыытыллыаҕа, ол кэмҥэ боломуочуйалар тохтуулларын эмиэ учуоттуохха наада. Мин саныахпар, барытын нырылаан-нарылаан көрөн, саас-сааһынан киллэрэр, кичэйэн, имигэстик толорор ордук ”.
Хаартыскалар куйаар ситимиттэн ылылыннылар
-
0
-
0
-
0
-
0
-
0
-
0
