Уопсастыба

Өлүөхүмэ улууһуттан Сири оҥоруу сулууспатын кылаабынай агронома Сардаана Никитина улууска хомуур хайдах түмүктэнэн эрэрин туһунан маннык иһитиннэрэр:
-- Бас билии көрүҥүттэн тутула суох, улуус үрдүнэн 15 277 туонна оту оттуур сорудах түһэриллибитэ. Алтынньы 1 күнүнээҕи туругунан, 14 023 туонна от чөкөтүлүннэ. Сайын устата күөх быйыҥ күрэҕэр 427 звено: 70 толору мэхэньисээссийэлээх, 394 ситэтэ суох мэхэньисээссийэлээх, 25 көлө-илии уонна 35 илиинэн отуур звенолар, барыта 1 889 отчут уонна 554 арас мааркалаах тыраахтар үлэлээтилэр. 

Ыраах учаастактарынан оттуурга А.С. Федоров, М.Е. Свешников, В.В. Алексеев, Н.В. Коротких бааһынай хаһаайыстыбалара 4 мобильнай биригээдэни тэрийэн, 210 туоннаны оттоон, былааннарын 110 % толордулар.  Ааспыт кыстыктан ордубут 668 туонна кур от баар.
Сүөһү эбии аһылыгар анаан 462,5 туонна сенаж оҥоһулунна, 1 480 туонна сиилэс угулунна.

Саас бурдук 569,6 гектарга ыһыллыбыта. Онтон бүгүҥҥү туругунан, 121 гектар бааһынаттан баалабайынан 87 туонна бурдук хомулунна. Сүөһү сиир култуурата 936,809 гектарга, ол иһигэр 851,729 гектарга биир сыллаах от, 75 гектарга элбэх сыллаах от ыһыллыбыта. 760 гектар паардаммыта.

Хортуоппуй барыта 650,61 гекттарга олордуллубутуттан 602,61 гектар үүнүүтэ, баалабайынан 5 111 туонна хортуоппуй хомулунна. Гектар ахсыттан 85 сэнтиниэр ылылынна. «Саҥыйахтаах» кэпэрэтиип хамбаайынан хомуйа сылдьар. Билиҥҥитэ 23 гектартан (ыһыытын 35 %-ыттан) 150 туоннаны ылла.

Маны сэргэ 588,72 туонна (386,745 туонна аһаҕас буорга үүнэр, 201,973 туонна тэпилииссэҕэ үүнэр) оҕуруот аһа хомулунна.
Ардах кэлэ-кэлэ түһэр буолан, ханна даҕаны хомуур хаамыытын сүрдээҕин атахтаата. Ол да буоллар, хаһаайыстыбалар айылҕа ууммут быйаҥын барытын хомуйар соругу туруорунан үлэлии-хамсыы сылдьаллар.