«Арассыыйа Федерациятыгар аҕыйах ахсааннаах төрүт олохтоох омуктар бырааптарын мэктиэлээһин туһунан» федеральнай сокуон 3-с ыстатыйатыгар уонна «Арассыыйа Федерациятыгар бултааһын уонна булт ресурсаларын харыстааһын итиэннэ кэккэ сокуону таһаарар аакталарга уларытыылары киллэрэр туһунан» федеральнай сокуон 19-с ыстатыйатыгар киллэриллэр уларытыылары өйөөн, Судаарыстыбаннай Дуумаҕа олохтоммут бэрээдэгинэн киллэрэргэ быһаарыы ылынна.
Бу сокуон барыла Конституционнай суут ыйбыт алҕастарын көннөрөргө, аҕыйах ахсааннаах төрүт олохтоох омуктар үгэс буолбут хаһаайыстыбаннай дьарыктарын сайыннарыыга бултуур бырааптарын олоххо киллэрии төрүттэрин чопчулааһыҥҥа ананар.
«Арассыыйа Федерациятыгар аҕыйах ахсааннаах төрүт олохтоох омуктар бырааптарын мэктиэлээһин туһунан» федеральнай сокуон аҕыйах ахсааннаах төрүт олохтоох омуктар ураты социальнай-экономическэй уонна культурнай сайдыыларын, кинилэр төрүт сирдэрин-уоттарын, олохторун илгэтин, үгэс буолбут хаһаайыстыбаннай дьарыктарын, бултааһыннарын сокуонунан мэктиэлиир. Бу сокуон 3-с ыстатыйатыгар киллэриллиэхтээх уларытыы быһыытынан, тустаах сокуон төрүт үгэстэринэн дьарыктанар аҕыйах ахсааннаах төрүт олохтоох омуктар бэрэстэбииллэригэр эрэ буолбакка, олохтоох былаас уорганнарыгар, дуоһунастаах сирэйдэргэ эмиэ дьайыахтаах. Ону таһынан, сокуон билигин үлэлиир эрэдээксийэтинэн, кини балаһыанньалара аҕыйах ахсааннаах төрүт олохтоох омукка киирсибэт эрээри, кинилэр төрүт үгэстэринэн дьарыктанар сирдэригэр олорор дьоҥҥо, Арассыыйа субьегын сокуонунан олохтоммут бэрээдэгинэн, эмиэ тарҕаныахтарын сөп.
«Арассыыйа Федерациятыгар бултааһын уонна булт ресурсаларын харыстааһын туһунан» федеральнай сокуон 19-с ыстатыйатыгар аҕыйах ахсааннаах төрүт олохтоох омуктар, кинилэр общиналара итиэннэ аҕыйах ахсааннаах төрүт олохтоох омукка киирсибэт эрээри, кинилэр төрүт үгэстэринэн дьарыктанар сирдэригэр олорор дьон төрүт үгэһи хааччыйар сыалтан, утарынан туһанарга (айахтарын ииттэллэригэр) анал көҥүлэ суох бултуулларын туһунан ыйылла сылдьар. Маннык бултааһын бородууксуйата тус бэйэ туһанарыгар ананар эбэтэр булт бородууксуйатын соҕотуопкалыыр тэрилтэлэргэ батарыллар диэн ахсынньы 27 күнүгэр ТАСС иһитиннэрдэ.
-
0
-
0
-
0
-
0
-
0
-
0
