Амма улууһуттан икки нэһилиэк, Соморсун уонна Алтан нэһилиэктэрэ тыа сирин кэлимник сайыннарыы федеральнай бырагырааматыгар киирсэн, култуура дьиэлэрин тутуохтара. Бырагырааманы олоххо киллэриигэ хайаатар да кыттыгас үбүлээһин баар буолуохтаах.
«Улууспутугар култуура дьиэлэрэ эргэрдилэр, сорохторугар олох да суох буолан спортивнай саалалары, кыра балаҕаннары кулууп дьиэтэ гынан үлэлээн кэллилэр. Бэйэлэрин үлэлэринэн киэҥник биллэр Алтан уонна Соморсун нэһилиэктэрэ «Тыа сирин кэлимник сайыннарыы» федеральнай бырагыраамаҕа улуус дьаһалтатын кытта тэҥҥэ үлэлэһэн, үбүлээһини ылар буолбуттара олус үчүгэй. Маныаха, усулуобуйа быһыытынан хайаатар да кыттыгас үбүлээһин баар буолуохтаах. Онон бэйэм өттүбүттэн көмө буолан, хайаатар да бу дьиэлэр тутуллуохтаахтар, култуура таһыма үрдүөхтээх диэн санаанан салайтаран икки нэһилиэккэ биирдии мөлүйүөн солкуобайы биэрэргэ быһаарынан, сертификаттарын туттардым. Тутуулар кэлэр сылтан саҕаланыахтаахтар», - диэн Руслан Еремеевич санаатын «Амма олоҕо» хаһыакка үллэстэр.
Сертификаттары туттарыыга улуус баһылыгын э.т. Степан Кузьмин, кинини тутууга солбуйааччы Виктор Смирников, улуус култуураҕа уонна норуот айымньытыгар салалта салайааччыта Иван Иванов кыттыыны ыллылар.
Алтан нэһилиэгин баһылыга Николай Карамзин, култуура киинин дириэктэрэ Петр Неустроев, Соморсун нэһилиэгин баһылыга Алексей Кононов, култуура дьиэтин дириэктэрэ Надежда Иванова дириҥ махталларын тириэртилэр.
Санаттахха, 2023 сылга «Тыа сирин кэлимник сайыннарыы» судаарыстыбаннай бырагырааматыгар куонкурсу ааһан Саха Сириттэн үс бырайыак киирбитэ. Тас көстүүтүн тупсарыыга үбүлээһини Амма уонна Үөһээ Бүлүү оройуоннара ылыахтара. Ол курдук, 2023 с. Амма оройуонугар Соморсун (Михайловка) нэһилиэгэр норуот айымньытын дьиэтин уонна Алтан нэһилиэгэр култуура дьиэтин тутуутун саҕалыахтара. Оттон Үөһээ Бүлүү оройуонун Кэнтик нэһилиэгэр (Харыйалаах) биэс дьаһал былааннанна: локальнай уу ситимин тардыы, искусственнай бүрүөһүннээх универсальнай спортивнай былаһаакканы тутуу; уулуссаҕа сырдатыыны киллэрии; култуура уонна спорт киинин хапытаалынай өрөмүөнэ, фельдшерскэй-акушерскай пуун тутуута. Бырайыактар уопсай сыаналара 500-тэн тахса мөл. солк. буолуоҕа, итинтэн 400 мөл. солк. федеральнай бүддьүөттэн көрүллүөҕэ. Бу үлэлэр олоххо киирдэхтэринэ, тыа сирин олоҕун хаачыстыбатын тупсарарга көмөлөһүөхтэрэ.
-
3
-
0
-
0
-
0
-
0
-
0
