Уопсастыба

Ил Түмэн үһүс ыҥырыыга дьокутаата, «Полюс холода» тыа хаһаайыстыбатын потребительскэй кэпэрэтиибин толорооччу дириэктэрэ, «Алгыс» тыа хаһаайыстыбатын кэпэрэтиибин бырабылыанньатын бэрэссэдээтэлэ, Арассыыйа агробырамыысыланнай комплексын Бочуоттаах үлэһитэ, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Саха Өрөспүүбүлүкэтин астыыр-таҥастыыр салаатын туйгуна, «Арассыыйа үтүө санаалаах аанньала» национальнай бириэмийэ лауреата, «Меценат» итиэннэ «Бизнес уонна албан аат» уордьаннардаах Екатерина Алексеевна Портнягина улуус туйгуннук үөрэнэр уонна талааннаах оҕолорун өйөөн, Дьааҥы куорат орто оскуолатын баазатыгар тапталлаах оҕотун, Дьааҥы куорат оскуолатын бастакынан кыһыл көмүс мэтээлинэн бүтэрбит Алеша Портнягин сырдык  аатыгар  Туйгун үөрэнээччилэр улуустааҕы сүлүөттэрин сүүрбэ бэһис сылын тэрийдэ.

Быйылгы сүлүөккэ Адыаччы, Арыылаах, Боронук, Боруулаах, Дулҕалаах, Суордаах, Табалаах нэһилиэктэрин, Дьааҥы куорат уонна Баатаҕай бөһүөлэк орто оскуоларыттан барыта 60 туйгуннук үөрэнэр, араас таһымнаах научнай-практическай кэмпириэнсийэлэргэ ситиһиилээхтик кыттар оҕолор ыҥырыллан сырыттылар.

Өрөгөй ырыатынан саҕаланан

Сүлүөт аһыллыыта Арассыыйа Федерациятын, Саха Өрөспүүбүлүкэтин уонна Дьааҥы улууһун Өрөгөй ырыаларынан саҕаланна. Туйгун үөрэнээччилэр улуустааҕы сүлүөттэрин кыттыылаахтарын эҕэрдэлээн, Дьааҥы улууһун дьокуттааттарын сэбиэтин бэрэссэдээтэлэ Екатерина Ноговицына, улуустааҕы үөрэх управлениетын начаалынньыгын солбуйааччы Иван Попов, Дьааҥы куорат дьаһалтатын баһылыгын солбуйааччы Сергей Окоемов, Дьааҥы куорат орто оскуолатын дириэктэрин иитэр-үөрэтэр үлэҕэ солбуйааччы Сардаана Стручкова тыл эттилэр, сүлүөт суолтатын бэлиэтээтилэр.

Салгыы Алеша Портнягин бастакы учуутала Мария Аммосова уонна биир кылааска үөрэммит доҕотторо Надежда Слепцова, Людмила Ткаченко Алеша оскуолаҕа хайдах үөрэммитин, ханнык биридимиэттэри чорботон сөбүлээбитин, успуорт ханнык көрүҥнэринэн дьарыктаммытын туһунан истиҥ-иһирэх тылларынан ахтан-санаан аастылар. Екатерина Алексеевна тапталлаах оҕотун туһунан кэпсээбитин сүлүөт кыттыылаахтара улаханныын-кыралыын бары олус долгуйа иһиттилэр.

Үөрэх туйгуннарын бэлиэтээһин сиэрэ-туома үөрүүлээх быһыыга-майгыга ыытылынна. Дохсун ытыс тыаһын ортотугар оҕолорго өйдөбүнньүк мэтээллэр уонна харчынан бириэмийэлэр туттарылыннылар. Үс оҕо: Дьааҥы куорат орто оскуолатын 6-с кылааһын үөрэнээччитэ Кристина Соловьева, Арыылаах орто оскуолатын 5-с кылааһын үөрэнээччитэ Тимур Васильев, Баатаҕай орто оскуолатын 7 «а» кылааһын үөрэнээччитэ Аливия Иванова Дьокуускай куорат «Бэс чагда» диэн оҕо сынньанар, доруобуйатын чэбдигирдэр киинигэр путевканан наҕараадаланнылар. Сүлүөт бастакы чааһа Алеша Портнягин суруйбут хоһоонугар айыллыбыт «Төрөөбүт-үөскээбит мин Дьааҥым» диэн ырыанан түмүктэннэ.

Туйгуннартан туйгуннар

Күнүстэн киэһэ «Сыл үөрэнээччитэ – 2025» диэн хас да түһүмэхтээх интеллектуальнай оонньуу тэрилиннэ. Хас оскуола ахсыттан биирдии оҕо кытынна. Оонньуу бэйэни бииһиннэрииттэн саҕаланна. Күрэхтэһээччилэр иккис түһүмэххэ Алексей Портнягин сырдык аатыгар анаммыт Туйгун үөрэнээччилэр улуустааҕы сүлүөттэрэ уонна «Сыл үөрэнээччитэ» интеллектуальнай оонньуу тэриллиэҕиттэн бэйэлэрин оскуолаларыттан кимнээх итиэннэ хас сыллаахха кыттыбыттарын туһунан кэпсииргэ бэлэмнэнэн кэлэргэ бэриллибит дьиэтээҕи сорудаҕы хайдах толорбуттарын көмүскээтилэр.

Үһүс түһүмэххэ Улуу Кыайыы 80 сылынан, оскуола бырагырааматыгар сөп түбэһиннэрэн, 1941-1945 сс. Аҕа дойдуну көмүскүүр Улуу сэрии уонна Дьааҥы улууһун устуоруйаларыгар анаммыт ыйытыыларга хоруйдаатыгар.

Төрдүс түһүмэх араатардыыр ускуустубаҕа ананна. Оҕолор тардан ылбыт билиэттэригэр суруллубут тиэмэлэри арыйан, араатардаан иһитиннэрдилэр. Күрэхтэһээччилэр «Сыл үөрэнээччитин» аатын ылар туһугар күрэстэһиигэ бары даҕаны дьоһуннаахтык кииристилэр, үөрэхтэригэр чахчы туйгуннарын, элбэхтик ааҕалларын, дьарыктаналларын, билиилэрэ-көрүүлэрэ киэҥин көрдөрдүлэр, биир да ыйытыыга мунаахсыйан, иҥнэн-толлон турбатылар, барытыгар сөптөөх хоруйу биэрэн истилэр.

Түмүккэ саамай элбэх баалы ылан, «Сыл үөрэнээччитэ – 2025» аатынан Дьааҥы куорат орто оскуолатын 11-с кылааһын үөрэнээччитэ Андриян Томскай бэлиэтэннэ. Портнягиннар дьиэ кэргэн олохтообут 30 тыһ солк. суумалаах харчынан бириистэрин уонна Алеша Портнягин балтылара Каролина, Татьяна Ефимовалар туруорбут кинопроектордарын тутта. Иккис миэстэни Суордаах орто оскуолатын 11-с кылааһын үөрэнээччитэ Дарина Гаврильева ылан, Алеша Портнягин эдьиийэ Марианна Слепцова олохтообут 10 тыһ солк. бирииһин, Алеша Портнягины кытары бииргэ үөрэммиттэр туруорбут смартфон бириистэрин тутта. Бочуоттаах үһүс миэстэҕэ үс оҕо: Арыылаах орто оскуолатын 11-с кылааһын үөрэнээччитэ Анжелика Васильева, Боруулаах орто оскуолатын 9-с кылааһын үөрэнээччитэ Лилия Лазарева, Адыаччы орто оскуолатын 10-с кылааһын үөрэнээччитэ Алина Потапова тиксэннэр, Алеша Портнягин аймахтара олохтообут 10-нуу тыһыынча солкуобай харчынан бириистэрин туттулар.

Төрдүс миэстэни Баатаҕай орто оскуолатын 11-с кылааһын үөрэнээччитэ Владимир Слепцов, Табалаах орто оскуолатын 8-с кылааһын үөрэнээччитэ Николина Стручкова үллэһиннилэр. Эбээн Бытантай улууһун олохтооҕо Любовь Стручкова, «Полюс холода» кэпэрэтиип үлэһитэ Дария Стручкова уонна успуорт улуустааҕы кэмитиэтин салайааччы Александр Неустроев олохтообут харчынан бириистэрин, 6-лыы тыһыынча солкуобайы, туттулар.

Сүлүөт бүтүүтүгэр оҕолор «Полюс холода» кэпэрэтиип тардыбыт минньигэс астаах сандалытын тула олорон, тото-хана аһаатылар. Бэйэ бэйэлэрин кытары сэһэргэстилэр, оскуоланы бүтэрээччилэр ким ханнык үөрэххэ туттарса барарга былааннанарын, туох идэлээх үлэһит буолар баҕалааҕын туһунан ирэ-хоро кэпсэттилэр.

Түмүк оннугар

Дьэ бу курдук Дьааҥы куорат оскуолатын бастакынан кыһыл көмүс мэтээлинэн бүтэрбит Алексей Портнягин сырдык аатыгар анаммыт Туйгун үөрэнээччилэр улуустааҕы 25-с үбүлүөйдээх сүлүөттэрэ киэҥ бырагырааманан, бэрт тэрээһиннээхтик буолан ааста. Сүлүөт кыттыылаахтарыгар, туйгун үөрэнээччилэргэ, Дьааҥы улууһун инники кэскилин түстүүр эдэр биир дойдулаахтарбытыгар анаммыт үтүө тыллар, баҕа санаалар, алгыстар барылара туолуохтуннар. Туйгуннук үөрэнэр, култуурунай-маассабай, уопсастыбаннай үлэҕэ көхтөөхтүк кыттар, үөрэххэ-билиигэ уонна успуортка үрдүк ситиһиилэрдээх, көрсүө-сэмэй майгылаах оҕолор кэккэлэрэ хаҥыы туруохтун.

Екатерина Алексеевна элбэх киһини дохуоттаан олорор «Полюс холода» кэпэрэтииби салайар үлэтигэр дьүөрэлээн, иитэр-үөрэтэр эйгэҕэ хас да бырайыактаах. Ол курдук, Боронук агрооскуолатын үөрэнээччилэрэ кэпэрэтиип ынах сүөһүнү иитэр пиэрмэтигэр быраактыкаланалларын хааччыйар, онон оҕолор сүөһүнү иитии төрүттэрин туһунан кинигэттэн ылбыт билиилэрин чиҥэтэллэр. Иккиһинэн, Дьааҥы куорат оскуолатын үрдүкү кылааһын үөрэнээччилэриттэн биригээдэ тэрийэн, сайын аайы оттотор, инньэ гынан, уолаттар тыа сирин хара үлэтигэр үөрэнэллэр уонна уһун өрөбүллэрин туһалаахтык атаараллар, хамнас аахсаллар. Үсүһүнэн, оҕотун Алексей Портнягин сырдык аатын үйэтитэн, Туйгун үөрэнээччилэр улуустааҕы сүлүөттэрин тэрийэн, бастыҥ үөрэнээччилэри чиэстиир, оҕо аймах бырааһынньыгын тэрийэр.

Светлана ВАСИЛЬЕВА,  оскуола дириэктэрин сүбэһитэ.

Дьааҥы к.

Хаартыскалары ааптар хааччыйда