Быйыл биһиги бөһүөлэкпититтэн 14 көс тэйиччи баар Омук Күөлэ диэн оскуола базатыгар Явловский Дмитрий Васильевич салайыытынан аҕыс буолан балыктаатыбыт. Уолаттар хас биирдиибит иккилии илимнээх барбыппыт. Булчут сиэрин-туомун тутуһан, аал уоту аһатан, маспытын бэлэмнээн, ойбон алларан, илиммитин үтэн, бастакы күммүтүн атаарбыппыт.
Иккис күммүтүгэр сарсыардаттан илимнэрбитин көрбүппүт. Эбэбит барахсан көмүс хатырыктааҕынан күндүлээн үөрдүбүтэ. Урукку сылларга холоотоххо, балык аҕыйах сыла да буоллар, санаабытын түһэрбэтэхпит. Тоҕо диэтэххэ, булчут мыыныа суохтаах. Илим көрүнэн баран, чугастааҕы талахтарга куруппааскыга туһах, куобахха хапкаан ииппиппит.
Өссө Дмитрий Васильевич киискэ төрүөт уурарга үөрэппитэ. Тыаҕа көҥдөй маһы булан, хайдах сатабыллаахтык мэҥиэ уурары биллибит. Оттон киэһэтин оһох отто-отто, остуол тула олорон саахыматтаан, дуобаттаан, арааһы кэпсэтэн, таабырын таайсан аралдьыйабыт.
Күһүҥҥү сынньалаҥмытын сылын аайы оскуола базатыгар атаарабыт, онон балыктааһын, булт үөрүйэхтэригэр үөрэнэбит. Уолаттар уочаратынан дьуһуурунайдыыбыт: ас астаан, иһит сууйан, уу баһан, мас хайытан, оһох оттон. Саамай хомойорбут диэн, бу сынньалаҥ олус кылгас, биир эрэ нэдиэлэ. Ол да буоллар, мин дьиэбэр уонча балыктаах, алта сордоҥноох, икки куобахтаах тиийэммин, дьоммун үөрдүбүтүм. Эһиил эмиэ барарбын күүтэбин.
Эрнст Ноговицын,
8 кылаас.
Орто Халыма, Өлөөкө Күөл б.
14№-дээх «Эдэр корреспондент» пост юнкора
-
0
-
0
-
0
-
0
-
0
-
0
