Кулун тутар 31 күнүгэр Нам улууһугар «Байанай» XXVI өрөспүүбүлүкэтээҕи күрэҕин үөрүүлээх арыллыыта буолла. Ил Түмэн сир-уот сыһыаннаһыытыгар, айылҕа баайыгар уонна экологияҕа кэмитиэт бэрэссэдээтэлэ Сахамин Афанасьев бу тэрээһиҥҥэ кыттыыны ылла.
Кини Саха Өрөспүүбүлүкэтин Ил Түмэнин Бэрэссэдээтэлин аатыттан өрөспүүбүлүкэтээҕи «Байанай» XXVI күрэҕин кыттыылаахтарын, сорсуннаах булчуттары, бары мустубут дьону, ыалдьыттары эҕэрдэлээтэ. Сахамин Афанасьев булчут Күнэ хас биирдии саха эр киһитигэр ураты суолталаах күн буоларын, өбүгэлэриттэн илдьэ кэлбит олоххо дьулуура, тулуура, айылҕаҕа ыкса ситимэ этигэр-хааныгар, кутугар-сүрүгэр, өйүгэр-санаатыгар иҥэн сылдьар диэн бэлиэтээтэ. Ол иһин бу күнү норуот ордук чугастык ылынар уонна өрө көтөҕүллэн туран Аар айылҕаҕа, Байанайга сүгүрүйэн туран бэлиэтиир ытык күнэ диэн эттэ уонна наҕараадалары туттартаата.
«Нам улууһа» МТ аҕа баһылыга Юрий Слепцов, СР тыатын хаьаайыстыбатын министирэ Александр Атласов ыраахтан-чугастан кэлбит ыалдьыттары Баай Байанай күнүнэн эҕэрдэлээтилэр.
Нам улууьун чаҕылхай уола- Максим Аммосов торообут дойдутуттан Хатырыктан «Махсыым уолаттара» вокальнай бөлөх дириҥ ис хоһоонноох ырыата мустубут дьону сүргэлэрин көтөхтө, кыайыыга кынаттаата.
Өбүгэ үгэһин
Байанай алгыһын
Булт мындыр курэҕин
Кыраһа суругун
Уолугар көрдөрбөт
Уһуйбат такайбат
Ол саха буолбатах...
Салгыы мустубут дьоҥҥо ыраахтан кэлбит Жумарт Абильманов баһылыктаах Ленскай оройуонун делегацията эҕэрдэтин тиэртэ.
Кыттааччылар сааны хомуйууга, ыһыыга, саа араас көрүҥүттэн ытыыга, кутаа уотун оттууга, ойбон алларыытыгар, о.д.а. көрүҥнэргэ күрэхтэһиэхтэрэ. Маны сэргэ хамаандалар булт тиэмэтигэр, булт уонна булт баайын харыстааһын сокуонун, РФ булка быраабылатын билиилэрин тургутууга кыттыахтара.
-
0
-
0
-
0
-
0
-
0
-
0
