Кинилэр тыа сиригэр урбааны сайыннарыы перспективаларын, биисинэс актыыбынаhын үрдэтэргэ усулуобуйалары оңорууну уонна олохтоох оңорон таhаарыыны ѳйѳѳhүүнү дьүүллэстилэр.
Биир дьайыылаах үнүстүрүмүѳнүнэн олохтоох оңорон таhаарыыны сайыннарар территориялар (ТОР) буолуохтарын сѳп. Айсен Николаев эппитинэн, сѳп түбэhэр сокуон хайыы үйэ бу сылга ылыллыаҕа.
«Билиңңи бириэмэҕэ олохтоох оңорон таhаарыыны сайыннарар территориялары оңорорго Нам, Горнай уонна Мэңэ Хаңалас улуустарыгар бырайыактар кѳрүллэллэр. Саңа механизм Аартыка оройуоннарын эмиэ хабыан сѳп, ол норуот хаhаайыстыбатын үгэс буолбут салааларын, ол иhигэр балыктааhыны уонна таба иитиитин сайыннарар кыаҕы бириэҕэ», - диэн бэлиэтээтэ Айсен Николаев.
Кини Михаил Николаев Хаңалас улууhун «Эркээни Хочотун» сайыннарыы пилотнай территориятынан оңорорго кѳҕүлээhинин ѳйѳѳтѳ.
«Олохтоох оңорон таhаарыыны сайыннарар территориялар тустарынан сокуон кѳмѳтүнэн «Эркээни Хочото» бырайыак сайдар кыахтаныаҕа. Тыа хаhаайыстыбатын, ас-үѳл бырамыысыланнаhын уонна туризм бырайыактарын олоххо киллэриэххэ сѳп буолуоҕа», - диэтэ Михаил Николаев.
Санаттахха, бу бырайыак сүнньүнэн сайдыылаах социальнай уонна инженернэй инфраструктура буолар. Кини олоххо киирдэҕинэ, саңа үлэ миэстэлэрэ үѳскүѳхтэрэ, Дьокуускайга олохтоох бородууксуйаны тиэрдии кээмэйэ улаатыаҕа. Саңа ТОР бастакы резиденнэринэн эти астыыр уонна полуфабрикаттары, үүт бородууксуйаны оңорон таhаарар, итиэннэ быраҕыллыбыт бааhыналары чѳлүгэр түhэриинэн дьарыктанар тэрилтэлэр буолуохтарын сѳп.
Ону кытта оҕуруот аhын уурар тутуутугар, тэпилииссэ комплексыгар, үнүгэстэри атыылааhыңңа, итиэннэ барыанньаны уонна отон сироптарын, хортуоппуй элитнэй уонна репродукционнай сиэмэлэрин, туорахтаах уонна сүѳhү аhылыгар туттуллар култууралары оңорон таhаарыыга сыhыаннаах бырайыактар кѳрүллэллэр.
-
0
-
0
-
0
-
0
-
0
-
0
