- РФ Федеральнай Мунньаҕар Туһаайан этии — ааспыт сыл түмүктэрин таһаарыы, буола турар быһыыны-майгыны ырытыы уонна кэлэр сылларга дойду социальнай-экэнэмиичэскэй сайдыытын көрүү. Владимир Путин 2024 сыллаах Туһаайан этиитигэр Арассыыйа социальнай-экэнэмиичэскэй сайдыытын сыаналаата уонна кэлэр алта сылга сыал-сорук туруорда.
Бэрэсидьиэн 2030 сылга аан дойду түөрт улахан экэнэмиичэскэй державатын ахсааныгар киирэргэ амбициознай уонна стратегическай сыалы-соругу бэлиэтээтэ. Ону ситиһэргэ табаары тас дойдуга таһаарарга ВВП 17 бырыһыантан тахсыа суохтааҕын, оттон сүрүн салааларга үбү-харчыны угуу 70 бырыһыаҥҥа диэри үрдүөхтээх.
Туруоруммут сыалы-соругу ситиһэргэ, бастатан туран, квалификациялаах үлэһиттэр элбиэхтээхтэр, итиэннэ бэйэбит передовой технологиябыт сайдыахтаах.
Владимир Путин урбааны уонна экэниэмикэни өйүүргэ ханнык миэрэ ылынылларын иһитиннэрдэ. Уһук хоту эрэгийиэҥҥэ гаас ситимин салгыы тардарга оҥоһуллубут былааны кэпсээтэ. Социальнай гаастааһын бырагырааматын кэҥэтэн биэриэхтэрэ, оҕуруот аһын олордор табаарыстыбалар СНТ дьиэлээх учаастактарыгар диэри гаас турбатын аҕалыахтара.
Ону таһынан, сетевой гаас киирэр кыаҕа суох сиргэ аныгы экологичнай оборудование атыылаһарга судаарыстыбаттан субсидия көрүллүөҕэ.
Тас бэлиитикэ төһө даҕаны уустук туруктааҕын иһин, 2030 сылга салгын тырааныспарын сырыыта 2023 сылы кытта тэҥнээтэххэ, балтараа төгүл үрдүөхтээх. Онон 75 аэропуортары саҥардарга 250 млрд. солк. көрүллүөҕэ, дойду иһигэр сөмөлүөттэри оҥорон, авиакомпаниялар көтөр аалларын саҥардан иһиэхтэрэ. Кэлэр сылларга Хотугу муора суолун сайыннарыахтара, эрэгийиэннээҕи суоллары тутарга болҕомто ууруллуоҕа.
Хаартыска: Василий Кононов, "РИА-Новости"
-
0
-
0
-
0
-
0
-
0
-
0
