.
«Уһук Илиҥҥи уулусса» быыстапка уонунан дойдулартан тыһыынчанан ыалдьыттарга Уһук Илиҥҥи эрэгийиэннэр култуураларын уратыларын уонна экэнэмиичэскэй кыахтарын билиһиннэрэр, бу сирдэргэ инвестордары уонна туристары тардар ураты кыах буолар. Пуорумҥа кэлэр дьоҥҥо Уһук Илин диэн тугун, дьон хайдах олорорун көрдөрөр улахан суолталаах”, — диэн РФ Бырабыыталыстыбатын Бэрэссэдээтэлин солбуйааччы – Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлэ Юрий Трутнев эттэ.
Билигин павильоннар тас көрүҥнэрэ уонна быыстапкалар ис хоһоонноро саҥардылла тураллар. Саха сирэ урукку экспозициятын уларытан, сайыҥҥы куйаас күнү, ураты култуураны көрдөрүөҕэ. Киин эбийиэгинэн алгыс түһэр Алтан сэргэ буолуоҕа.
Приморскай кыраай инвестордары тардыыга уонна Азия-Чуумпу акыйаан дойдуларын кытта бииргэ үлэлээһиҥҥэ болҕомтотун уурар. Сахалин уобалаһа бэйэтэ көтөр авиацияны оҥорууга ситиһиитин көрдөрүөҕэ, итиэннэ Хотугу Курильскай арыыларга айанныыры билиһиннэриэҕэ. Хабаровскай кыраай аныгы көтөр ааллар холобурдарын туһанан, технологическай ситиһии туһунан кэпсиэхтэрэ, оттон Чукуотка оптонуомунай уокуругун истиэндэтигэр ыалдьыттар куораты саҥардыы уонна үлэ кыахтарын туһунан билсиэхтэрэ. Амур уобалаһа ыалдьыттарга Благовещенскай-Хэйхэ кыраныысса таһынааҕы агломерация сайдыытын туһунан кэпсиэҕэ. Еврейскэй оптонуомунай уокурук ыалдьыттары быыстапкаҕа тимир уруудатын концентратын оҥорон таһаарыыны, бруцит уонна графит хостооһунун кытта билиһиннэриэҕэ.
Забайкальскай кыраай эрэгийиэн инвестицияҕа уонна логистикаҕа кыаҕын көрдөрүүгэ болҕомтотун уурар. Быыстапкаҕа анаан алта миэтэрэттэн тахса үрдүктээх Даши Намдаков ураты монуменнаах скульптурата туруоҕа.Камчаатка кыраайа ыалдьыттары виртуальнай туристыыр айаҥҥа илдьэ барыаҕа. Магадаан уобалаһа Аартыканы чинчийэр киин сайдыытын уонна чинчийии түмүктэрин билиһиннэриэҕэ, ону тэҥэ хаарынан уонна бадараанынан айанныыр «Бурлак» массыынаны көрдөрүүгэ туруоруоҕа. Бурятия Өрөспүүбүлүкэтэ туризм кыаҕын көрдөрүүгэ болҕомтотун уурар уонна илиҥҥи мэдиссиинэ киинин билиһиннэриэҕэ, ону тэҥэ, уустар галереяларын — норуот уус-уран оҥоһуктарын быыстапката, атыыта баар буолуоҕа.
“Уһук Илиҥҥи уулусса” быыстапка Илиҥҥи экэниэмикэ пуорумун бырагырааматын биир чаҕылхай өрүтэ буолар. Үгэс быһыытынан, манна Владивосток олохтоохторо, элбэх омук ыалдьыттара кэлэллэр. Быыстапка Уһук Илин кэлим сайдыытын хаамыытыгар, саҥа инвестордары тардыыга уонна тэрилтэлэр күрэстэһэр кыахтарын бөҕөргөтүүгэ, ыалдьыттары эрэгийиэн олохтоохторун ураты култуураларын, кэскиллээх туристическай хайысхалары уонна улахан инфраструктура бырайыактарын кытта билиһиннэриигэ улахан кылааты киллэрэр”, – диэн РФ бэрэсидьиэнин сүбэһитэ, Илиҥҥи экэнэмиичэскэй пуорум тэрийэр кэмитиэтин эппиэттээх сэкирэтээрэ Антон Кобяков.
Быыстапка уулуссатыгар дегустациялыыр сир аһыллыаҕа, онно Уһук Илиҥҥи гектаарга оҥоһуллубут бородууксуйаны амсайыахха, босхо сир бырагырааматын туһунан информацияны ылан, быһаччы сибээстэһиэххэ сөп.
Бүтүн Арассыыйатааҕы “Дальний Восток – Страна приключений” айан күрэҕин кыттыылаахтара быыстапка ыалдьыттарын кытта Уһук Илиҥҥэ айанныыр тус уопуттарын үллэстиэхтэрэ — павильоҥҥа кинилэр видеонан күннүктэрин көрүөххэ, ааспыт маршруттарын үөрэтиэххэ сөп.
Хаартыскалар куйаар ситимиттэн ылылыннылар
-
0
-
0
-
0
-
0
-
0
-
0