Уһук Илин пуорум иккис төгүлүн дьону түмүөҕэ, быйыл Дьокуускайга Уһук Илин 11 субъегыттан, Арассыыйа атын эрэгийиэннэриттэн уонна тоҕус омук сириттэн ыалдьыттар кэлиэхтэрэ. Тэрийээччилэр суолталаах пуорум дьыалабыай, үөрэтэр уонна култуурунай бырагырааматын билиһиннэрдилэр. «Үлэ кыбаартала» креативнай кластерга үс күн иһигэр 150 тэрээһин буолара былааннанар. Ол иһигэр стратегическай сиэссийэлэр, питчинг-сиэссийэ, араас хайысхаҕа туһуламмыт кэмпириэнсийэ, быыстапка, бэстибээл уо.д.а. кэрэхсэбиллээх тэрээһин.
Пуорумҥа эспиэрдэр, инвестордар, айар куттаах урбаанньыттар, араас эрэгийиэннээҕи уонна федеральнай тэрилтэлэр бэрэстэбиитэллэрэ кыттыахтара. Тэрээһиҥҥэ тоҕус дойду аатыттан алта тыһыынчаттан тахса киһи кыттара күүтүллэр.
СӨ Бырабыыталыстыбатын бэрэссэдээтэлин солбуйааччы Анатолий Семенов өрөспүүбүлүкэ Уһук Илин креативнай экэниэмикэҕэ лиидэр быһыытынан биллэрин бэлиэтээтэ. Кини креативнай индустрияҕа, бастатан туран, сонун идиэйэлээх, талааннаах дьон киирэллэрин биллэрдэ, оттон былаас сүрүн сыала-соруга кинилэр сайдалларыгар сөптөөх усулуобуйаны тэрийии.
«Креативнай индустрияны айар дьоҕурдаах дьон туталлар, кинилэр сайдалларыгар өйөбүл, кэпсэтии, санаа атастаһыыта, бырайыактарга үбү-харчыны угуу ирдэнэр. Пуорумҥа элбэх ыалдьыттар кэлиэхтэрэ, биһиги кинилэргэ саха киинэтэ, көмпүүтэр оонньуута, анимация хайдах оҥоһулларын көрдөрүөхтээхпит. Бу эйгэҕэ биһиги, чахчы, киэн туттар дьонноохпут.
Киинэттэн ураты муоданы, муусуканы, дьон сайдар кыахтаах хайысхаларын өйүүбүт. Саха ыччата айар үлэҕэ дьулуһар, онно баҕалаах уонна эниэргийэлээх. Биһиги кинилэр Саха Сиригэр эрэ буолбакка, тас дойдуларга, тас ырыынакка тахсан талба талааннарын көрдөрүөхтэрин баҕарабыт. Биллэн турар, бу уустук суол эрээри, биһиги онно итэҕэйэбит», — диэтэ Анатолий Семенов.
Кини бу пуорумҥа Саха Сиринээҕи креативнай индустрия бэрэстэбиитэллэрэ бэйэлэрин көрдөрүөхтэрин сөбүн туһунан эбэн эттэ. Биһиги дойду киин куораттарыттан тэйиччи олоробут, ол иһин сүрүн партнердары кытта санаатахпыт аайы сирэй көрсөр кыахпыт суох.
Пуорум айар дьоҥҥо маннык кыаҕы биэрэр, ким эрэ бырайыагын олоххо киллэрэргэ наадалаах үбүлээччитин булуо, тэрилтэ салайааччыларын, эспиэртэри кытта кэпсэтиэ. Креативнай индустрия пуорума айар куттаах саха урбаанньыттара бырайыактарыгар болҕомтону тардан, ону олоххо киллэрэргэ үбүлээччилэри булан, саҥа таһымҥа тахсалларыгар, сайдыы саҕахтарын арыйалларыгар сүрүн тирэх буолуо. Аан дойду таһымнаах тэрээһин айар үлэҕэ сырдыгынан сыдьаайар саҥа сулустары саҕан, кэскиллээх буолара күүтүллэр.
Ол туһунан сиһилии "Ил Түмэн" хаһыат кэлэр нүөмэригэр ааҕыҥ.
-
0
-
0
-
0
-
0
-
0
-
0
