Балаҕан ыйын 8 күнүгэр Ил Дархан Айсен Николаев Өрөспүүбүлүкэ Бырабыыталыстыбатын уонна дьаһалтатын салайааччыларын кытта мунньахха эрэгийиэн дэлэгээссийэтин Илиҥҥи экэнэмиичэскэй пуорумҥа кыттыытын түмүктэрин таһаарда.
Айсен Сергеевич ВЭФ-2025 саҥа сөбүлэһиилэри түһэрсэргэ уонна Уһук Илин социальнай-экэнэмиичэскэй сайдыытын биир лидердэриттэн биирдэстэрин быһыытынан Саха Сирин бөҕөргөтөргө таһаарыылаах былаһаакканан буолла диэн бэлиэтээтэ. Пуорум түмүгүнэн өрөспүүбүлүкэ 106 миллиард солкуобайтан тахса уопсай суумалаах 27 сөбүлэһиигэ илии баттаата. Онуоха уопсай инбэстииссийэ бартыбыала 641 миллиард кэриҥэ солкуобайы таһымнаата. Бу туһунан Саха Сирэ иһитиннэрэр.
«Бу – салгыы үлэҕэ сүдү бааза, ол биһиэхэ бөдөҥ бырайыактары олоххо киллэриигэ уонна дьон олоҕун хаачыстыбатын тупсарыыга инники хамсыырга кыах биэриэ», — диэн Айсен Николаев чопчулаата. Өрөспүүбүлүкэ баһылыга сүрүн түмүктэр ахсааннарыгар «ОКТО групп» хампаанньаны кытта инбэстииссийэни тардыыга уонна Саха Сирин экэниэмикэтин сайыннарыыга, социальнай өйөбүл, үөрэх, доруобуйа харыстабыла уонна экология эйгэтигэр бииргэ оҥоһуллар бырагыраамалары олоххо киллэриигэ сөбүлэһиини ыйда.
ВЭФ-2025 кэмигэр сыыппара трансформациятын боппуруостарыгар ураты болҕомто уурулунна. Айсен Николаев уонна Сбербаан Бэрэсидьиэнэ, бырабылыанньа бэрэссэдээтэлэ Герман Греф сыыппара технологияларын, үөрэхтээһин көҕүлээһиннэрин эйгэтигэр бииргэ оҥоһуллар бырайыактары, Оҥоһуу өй лабораториятын үлэтин уонна инновационнай быһаарыылары киллэриигэ сыһыаннаах атын хайысхалары дьүүллэстилэр. Сүрүн хайысхаларынан Дьокуускайга 2 млрд солк. кэриҥэ инбэстииссийэни тарҕатар кииннэри арыйар Арассыыйа бастыҥ маркетплейстарын — «Озон» уонна «Wildberries» кытта сөбүлэһиилэр буоллулар. Айсен Николаев бэлиэтээбитинэн, кинилэр Саха Сирин ырыынагар саҥа үлэ миэстэлэрин таһаарыа, логистиканы тупсарыа уонна нэһилиэнньэҕэ табаар сыанатын түһэриини хааччыйыа.
Түмүккэ Айсен Николаев Бырабыыталыстыба хамаандатыгар пуорумҥа таһаарыылаах үлэтин иһин махтанна уонна сүрүн сорук илии баттаммыт сөбүлэһиилэри олоххо киллэрии буоларын бэлиэтээтэ.
Хаартыска: sakha.gov.ru
-
0
-
0
-
0
-
0
-
0
-
0
