Хампаанньа Дьокуускай куоракка 30 тыһ. м2 иэннээх ыскалааты тутарга 1,8 млрд. солк. үбү угуохтаах уонна 900 үлэ миэстэтин тэрийиэхтээх. Ил Дархан Айсен Николаев бырайыагы өйүүрүн туһунан эттэ, атыы-эргиэн инфраструктуратын сайыннардахха өрөспүүбүлүкэ олохтоохторун сакааһын тиэрдии сыыдамсыйыа, итиэннэ үлэ миэстэтэ тахсыа диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.
Ил Дархан Айсен Николаев уонна Татьяна Ким маркетплейска олохтоох оҥорон таһаарааччылар бородууксуйаларын Арассыыйа ырыынагар таһаарарга «Саха Сиригэр оҥоһуллубута» диэн атыы-эргиэн салаатын арыйыахха сөбүн туһунан кэпсэттилэр. «Муода бырыгыраамата: маарка, фабрика, ритейл» Дьокуускайдааҕы акселератор финалистарыгар кэллиэксийэлэрин таһааралларыгар кэккэ чэпчэтиини көрөр туһунан ырытыстылар.
2024 с. тэриллэр акселератор бырагыраамата Саха Сирин брендовай таҥаһын-сабын уонна ювелирнай киэргэллэрин Арассыыйа уонна аан дойду ырыынагар таһаарарга, атыы-эргиэн улахан кииннэрин, онлайн-былаһааккалары кытта сибээһи олохтуурга көмөлөһөр.
Итинник кэпсэтии кэнниттэн пуорумҥа СӨ Бырабыыталыстыбата уонна «Wildberries&Russ» хампаанньа инвестиционнай бырайыагы олоххо киллэрэргэ сөбүлэһиини түһэристилэр.
Ил Дархан өрөспүүбүлүкэҕэ элбэх киһи таҥаһы, туттар тэрили «Wildberries» нөҥүө сакаастыырын, куоракка, тыа сиригэр табаары биэрэр пуун ахсаана эбиллэ турарын санатан туран, логистическай киин тутуута табаары тиэрдиигэ, дьон олоҕун тупсарарга тирэх буоларын бэлиэтээтэ.
«Wildberries» хампаанньаны төрүттээччи, тэрийээччи, генеральнай дириэктэр Татьяна Ким тырааныспарынан табаары тиэрдиини тупсарарга Дьокуускайга логистическай киин тутулуннаҕына, сакааһы тиэрдии болдьоҕо кыччыан, оттон сыаната арыый чэпчиэн сөбүн туһунан иһитиннэрдэ.
СӨ Ил Дарханын уонна Бырабыыталыстыбатын пресс-сулууспатын хаартыската.
-
0
-
0
-
0
-
0
-
0
-
0
