«Көмүлүөк» атыы-эргиэн хампаанньатын генеральнай дириэктэрэ, «Саха Сиригэр оҥоһуллубута» урбаанньыттар түмсүүлэрин салайааччыта Ольга Григорьева Владивостокка бара сылдьан хабылыкка уонна хаамыскаҕа аан дойдуга бастакы чөмпүйэнээти тэрийдэ.
«Саха Сирин оҥорон таһаарааччылара «Wildberries» уонна «Ozon» маркетплейска тахсар кыахтаммыттара урбаан сайдыытыгар биир бэлиэ түгэн. Кинилэр табаардарын өрөспүүбүлүкэ иһигэр эрэ атыылыыр этилэр, оттон билигин бүтүн Арассыыйа үрдүнэн мөлүйүөнүнэн атыылаһааччыларга тахсарга саҥа саҕах аһылынна.
Биллэн турар, маркетплейска күрэстэһии улахан, атахха бигэтик турарга уонна салгыы сайдарга табаар суутугар үбү-харчыны угуохха, логистиканы тэрийиэххэ, сиэрбиһи, дьон санаатын кэтээн көрүөххэ наада. Киин сиртэн тэйиччи сытар буоламмыт тырааныспар ороскуота улахан, усулуобуйабыт тыйыс эрээри, сайдарга саҥа кыах көһүннэ. Өскөтүн урут үөһээ тахсар кирбиибит олохтоох ырыынак эрэ буоллаҕына, билигин ол сүтэн, ыырбыт кэҥиир.
«Саха Сиригэр оҥоһуллубута» түмсүү урбаанньыттарга уопут атастаһан, уопсай соругу быһаарарга, табаары улахан ырыынакка таһаарарга саҥа угуйар ньыманы буларга көмөлөһүө. Ол эрэн ситиһии сүрүн тирэҕэ хас биирдии оҥорон таһаарааччыттан тутулуктаах. Маркетплейстар атыылыыр табаардарын эгэлгэтэ элбэх, онон хас биирдии атыылаһааччы туһугар күүскэ киирсэллэр”, — диэн этэр Ольга Григорьева.
Ольга Олейник хаартыскаҕа түһэриилэрэ.
-
0
-
1
-
0
-
0
-
0
-
0
