«Умнас» суолунан бэйэлэрэ уонча туонна ыйааһыннаах тимир көлөлөр 20 туонналаах сиэмэни таһаллар. Таһаҕастара нуорманы аһары бардаҕына, ыстараап кээмэйэ 375 000 солк. Ол иһин, ким хайдах сатыырынан ыстарааптан куота сатыыр.
Бу боппуруоһу Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэтин мунньаҕар дьүүллэстилэр. Сис кэмитиэт бэрэссэдээтэлэ Павел Петров уопсастыбаннай түмсүүлэртэн, биирдиилээн дьонтон ыйааһыны хонтуруоллуур тэрил тула элбэх сурук киирэрин иһитиннэрдэ. Улахан тиэхиньикэ суолу алдьатара эбии ороскуоту үөскэтэр, атын өттүнэн хааһынаны хаҥатар урбаанньыттар үлэлиэхтэрин, таһаҕас тиэллиэн наада.
Тырааныспар уонна суол хаһаайыстыбатын миниистирэ Владимир Сивцев ыарахан таһаҕаһы тиэйэр массыыналар сырыыларын көрөргө-истэргэ федеральнай сокуон, РФ Бырабыыталыстыбатын уурааҕа баарын санатта уонна бу хайысханан өрөспүүбүлүкэҕэ туох үлэ ыытылларын билиһиннэрдэ. Улахан массыыналар төһө таһаҕаһы тиэммиттэрин көрөр пуун көмөтүнэн, Суол управлениета, Ространснадзор уонна ГАИ бэрэбиэркэлииллэр. Быйыл кулун тутар 1 күнүттэн Хаҥалас улууһугар («Умнас» суолугар) уонна Дьокуускайтан Намныыр суолга АПВГК (ыйааһыны уонна таһаҕас кээмэйин хонтуруоллуур автоматическай пуун) үлэтин саҕалаабыт. Маннык пууннар улахан аартыктарга туруоруллан иһиэхтээхтэр. Ол курдук, «Бүлүү» айан суолун управлениета икки пууну туруоруохтаах. Ленскэй улууһун «Мухтуйа» эрэгийиэннээҕи суолга Хотугу Нүүйэ бөһүөлэк диэки биир пууну туруорарга хантараах түһэрсиллибит, таҥар үлэтэ бүттэҕинэ, пуун 2026 с. үлэлээн барыахтаах. 2027 с. Аллараа Бэстээх тимир суолун ыстаансыйатыттан Аммалыыр суолга туруоруллуохтаах. Ыйааһыны хонтуруоллуур хаамыралар төһө сөпкө көрдөрөллөрүн РФ Бырабыыталыстыбатын уурааҕар олоҕуран, ыйыллыбыт болдьоххо булгуччу бэрэбиэркэлииллэр.
Миниистир ыарахан уонна улахан таһаҕаһы тиэйиигэ көҥүллэммит нуорманы кэһии баарын, суоппардар ыстараабы төлөөмөөрү тырааныспар нүөмэрин усталларын, кистииллэрин бэлиэтээтэ. Икки АПВГК алта ый үлэлээбитин тухары тырааныспар нүөмэрин кистээһин 3 700 түгэнэ баара биллибит, ол аата таһаҕаһы тиэйээччилэр көҥүллэммит нуорманы кэһэллэрин билэр уонна тиэхиньикэлэрин нүөмэрин хаамыраҕа көрдөрбөт эбиттэр.
Бу боппуруоска таһаҕаһы тиэйээччилэри уонна Госдуума дьокутааттарын кытары кэпсэтэ сылдьыбыттар. Министиэристибэ айылҕа баайын хостуур карьерга ыйааһыны туруорар инниттэн сир баайын туһунан федеральнай сокуоҥҥа уларытыылары киллэрэргэ туруорсубут.
Василий Кононов, ааптар хаартыскаҕа түһэриитэ.
-
0
-
0
-
0
-
0
-
0
-
0
