Быйыл икки коффердамы таҥан, өрүс сүнньүгэр үлэлиэхтэрэ, күргэ атахтарын, эстакада суолун тутуохтара. Кэлэр үс сыл иһигэр федеральнай бүддьүөттэн 40 млрд. солк. көрүллүөхтээх, өрөспүүбүлүкэ кыттыгас үбүлээһини оҥоруохтаах. Ол туһунан Айсен Николаев Анал этиитигэр иһитиннэрбитэ.
Суол-иис мөлтөх, саас-күһүн өрүскэ хаайтарыы буоларыттан сылтаан, ыраах улуустарга сөмөлүөт эрэ тиийэр. Онон салгын тырааныспарын эбийиэктэрин саҥардыы үлэтэ салҕанар. Өлүөхүмэ, Мииринэй аэропуортарын оҥорон, дьон сөмөлүөтүнэн көтөрүгэр табыгастаах усулуобуйа тэриллиэхтээх.
Зырянкаҕа 2028 с. уу ылбат үрдүк сиригэр саҥа аэропуорду тутуохтара. 2027 с. бүтүөр диэри Полярнай, 2030 сылы түмүктүөххэ диэри Ньурба аэропуордун бүтэриэхтээхтэр. Кэлэр биэс сылга 16 аэропуорт хапытаалынай өрөмүөнүгэр үп Росавиация иһинэн тэриллибит салгын тырааныспарын инфраструктуратын сайыннарыы пуондатыттан көрүллүөхтээх.
Биллэн турар, сөмөлүөт биир саамай сыаналаах тырааныспар ахсааныгар киирэр. 2026 с. Саха Сиригэр «Аартыка Росатома» муора биир кэлим оператора үлэтин саҕалыахтаах. Хотугу улуустарга ас-үөл, табаар муора суолунан таһыллыаҕа, бу хайысханан тырааныспар логистиката сайдыаҕа. Күн бүгүн таас чох сыанатын 45 %-ын тырааныспар ороскуота ылар, оттон Аартыка улуустарыгар тиэрдэргэ 77 %-ҥа диэри тиийэр.
Таһаҕаһы тиэрдэргэ анаан, кэнники 7 сылга 3200 км. усталаах суол, 59 күргэ оҥоһулунна. Өлүөхүмэ улууһун олохтоохторун төгүрүк сыл айан суолунан хааччыйарга былырыын бастакы түһүмэҕин түһэрдилэр.
Даппарай-Токо икки ардыгар үс күргэлээх 30 км. усталаах суол тутулунна. Алдан, Ленскэй, Мииринэй, Нерюнгри улуустарыгар «Олох инфраструктурата» национальнай бырайыак чэрчитинэн, 12 км. ирдэбилгэ эппиэттиир суол оҥоһулунна. Бүлүүгэ хапытаалынай өрөмүөн кэнниттэн иилии эргийэр суолу эрдэ бүтэрэн киллэрдилэр.
Дьокуускай-Аллараа Бэстээх икки ардыгар хаайтарыы кэмигэр өрүһү туоруур тырааныспар сырыытыгар элбэх хомуруйуу этиллибитэ. Мэҥэ Хаҥалас улууһун өйөбүлүнэн, дьону таһыыга саҥа урбаанньыттар киирдилэр. Онон төлөбүр сыаната икки төгүл түстэ. 203-с түөлбэттэн Күөх Хонуу диэки «Намыв» ыстаансыйаҕа мотуордаах оҥочону кэтэһэргэ сылаас дьиэ тутулунна.
Хаартыска Андрей Сорокин, СИА.
-
0
-
0
-
0
-
0
-
0
-
0
