Маннык этиини дойду экономистара кириисиһи утары эбии миэрэлэринэн ылыныахха сөптөөҕүн ыйаллар. Кинилэр сыаналыылларынан, былырыыҥҥы көрдөрүүнэн мөлүйүөнтэн намыһах дохуотаах нэһилиэнньэҕэ харчы түҥэтиллиэтээх.
– Билиҥҥи уустук балаһыанньаҕа аадырыстаах утарынан көмө нэһилиэнньэҕэ туттуллуон сөп. Күн бүгүҥҥэ диэри дойду Бырабыыталыстыбата бу курдук миэрэлэри туһанар – үлэтэ суохтарга үрдүк пособие ананар, үлэ биэрээччилэргэ хамнас төлүүргэ бырыһыана суох кирэдьиит уонна субсидия биэрэри сүбэлиир, - диэн Киин баан салайааччыта Эльвира Наибуллина быһаарар.
Кини этэринэн, аадырыстаах көмө төлөбүрэ нэһилиэнньэҕэ барытыгар буолбакка, эпидемиологическай балаһыанньанан эмсэҕэлээбит эрэ гражданнарга бэриллиэхтээх. Экспердэр холобурдаан этэр “бөртүөлэттэн харчы түҥэтиитэ”, быраабыла быһыытынан, экономикаҕа эбии көмө оҥоһуллар кыаҕа суох буоллаҕына туттуллар, - диэн Эльвира Наибуллина эбии быһаарар. Атыннык эттэххэ, "бөртөлүөтүнэн харчы түҥэтиитэ" сайдыылаах эрэ дойдуларга туһаныллар. Бу дойдуларга кирэдьиит ыстаапката нуулга тэҥнэһэн кириисис дефляцияҕа тиэрдиэн сөп. Экономикаҕа сыана эмискэ үрдүүрүттэн дефляция өссө эбии охсуулаах буолар. Манна даҕатан, Германияҕа уонна АХШ-гар харчы түҥэтиитэ - экономикаҕа уустук балаһыанньаттан тахсарга өссө эбии биир миэрэ ылыныытын көрүҥэ буолар. Оттон Арассыыйаҕа нэһилиэнньэҕэ харчы түҥэтиитэ кутталлаах – экономикаҕа эбии харчы киирдэҕинэ сыана эмискэ үрдүөн сөп. Экономикаҕа сыаллаан Киин Баан атын көмө оҥорору былаанныыр. Эльвира Наибуллина быһаарыытынан, сотору кэминэн ыытыллар Киин Баан директордар сэбиэттэригэр коммерческай бааннарга кирэдьиит ыстаапкатын түһэрэр туһунан сүбэлэһиэхтэрэ. Тутатына боппуруос үөскүүр. Бастакытынан, кириисис кэмигэр ким кирэдьиит ылыан сөбүй? Иккиһинэн, "бөртүөлүтүнэн харчы түҥэтии" араас докумуон толорууттан босхолуур судургу көрүҥ. Дьиҥ чахчытынан социальнай көмөнү ылыы Арассыыйаҕа уустук этэ, билигин өссө уустугурар диэн экспердэр быһаараллар. Үлэтэ суох буолуу пособие анааһынын ирдэбилинэн, штатнай испииһэккэ үлэһитинэн киирбэккэ хамнастанан олорбут дьон билигин пособие анатан ылар кыахтара суох. РФ Бырабыыталыстыбата экономикаҕа туһалааҕынан көрөн уонна социальнай кыһалҕалар үрдүү туралларын учуоттаан икки ардыларынан биир быһаарыыны ылыныахтарын наада буолла.
Санатар буоллахха, Госдуума дьокутаата, “Сиэрдээх Арассыыйа” партия фракциятын салайааччытын солбуйааччы, Госдуумаҕа доруобуйа харыстабылын кэмитиэтин бэрэссээдээтэлин бастакы солбуйааччы Федот Тумусов хас биирдии бырааһынньык күнүгэр бүддьүөттэн 10 тыһ. солк. түҥэтэр туһунан социальнай ситимнэргэ этии көтөхпүтэ.
-
0
-
0
-
0
-
0
-
0
-
0
