Госдуума дьокутаата, “Сиэрдээх Арассыыйа” партия фракциятын салайааччытын солбуйааччы, Госдуумаҕа доруобуйа харыстабылын кэмитиэтин бэрэссээдээтэлин бастакы солбуйааччы Федот Тумусов Күөх маай бырааһынньыктарын ыытыы туһунан социальнай ситимнэргэ  “Маай бырааһынньыктарын бэлиэтиири төрдүттэн бопсубаттарыгар этии киллэрэбин уонна дьон санаатын ылыналларыгар ыҥырабын. Бу уустук балаһыанньаҕа сөптөөх миэрэни хайдах ылыныахха сөбүй? Бэлиэтээн этэр буоллахха, бу күннэргэ бырааһынньык тэрээһиннэрин көһөрүү туһунан тыл көтөҕүллүбэт, чопчу бырааһынньыктааҕы өрөбүл күннэрин көһөрүү туһунан кэпсэтии барар. Дьиҥинэн ылан көрдөххө, үксэ барыбытыгар өрөбүл күннэрэ үөрүүлээх буолбаттара чахчы – билигин даҕаны ый кэриҥэ дьиэбитигэр олоробут. Мантан салгыы өссө төһө өр олорорбут бу диэн чопчу биллибэт. Мин санаабар, бырааһынньыктары атын болдьоххо көһөрөр ордук буолуо. Билиҥҥи эпидемиологическэй балаһыанньаҕа бырааһынньык күннэриттэн эмсэҕэлээбит дьону күөмчүлүүр кытаанах быһаарыы. Ити курдук, дьиэҕэ олоруу эрэсиимэ түмүктэнэр кэмигэр бу 3 күннээҕи өрөбүл күннэрин атын өрөбүллэргэ эбэн биэриэххэ сөп буолуо. Бу кэм иһигэр, холобур, дьиэҕэ олоруу кэмигэр өр көрсүбэтэх аймахтары, дьүөгэлэри, табаарыстары кытта көрсүөххэ сөп. Ону таһынан, билиҥҥи кэмҥэ кутталлаах коронавирус утары  үлэлиир дьоҥҥо дьоруойдуу үлэлэрин сыаналаан уоппускаларыгар эбии күннэри эбэн биэриэххэ. Мантан атын, үһүс көрүҥ эмиэ баар. Бырабыыталыстыба таһымыгар быһаарыы ылынан, норуоттан бырааһынньык өрөбүллэрин “атыылаһан” хас биирдии киһиэхэ харчынан төлүөххэ сөп этэ.  Мин санаабар, аадырыстаан дьоҥҥо харчы түҥэтиитэ суох биһиги экономикабыт кириисистэн өрүттэр кыаҕа суох. Аны туран, Бырабыыталыстыбаҕа сириэстибэлэри түҥэтэр оруна суох диир буоллахтарына, атын көрүҥүнэн, сөптөөх миэрэ ылыллан, харчы бэриллиэн сөп этэ. Быһа холоон, холобур, хас биирдии бырааһынньык күнүгэр 10 тыһ. солк.  Мин санаабар, маннык миэрэ кырдьыктаах буолуо этэ. Оттон эһиги туох дии саныыгыт?" - диэн санаатын үллэстэр.