Түмүк пленарнай мунньахтарга Ил Түмэн вице-спикерэ Виктор Губарев уонна Аҕыйах ахсааннаах төрүт олохтоох Хотугу омуктар уонна Аартыка дьыаларыгар сис кэмитиэтин бэрэссэдээтэлэ Елена Голомарева кыттыыны ыллылар.
Кэмпириэнсийэҕэ икки күн устата дьиэ табатын иитии сүрүн боппуруостарын – судаарыстыбаттан сир баайын хостуур тэрилтэлэргэ тиийэ хотугу төрүт дьарык салаатыгар уонна төрүт олохтоох аҕыйах ахсааннаах норуоттар олохторугар дьайыыларын дьүүллэстилэр.
— Хотугу сир төрүт олохтоох аҕыйах ахсааннаах норуоттарын кытта сыһыаннаһыыга таба иитиитин эрэ буолбакка, бүтүн социальнай-экэнэмиичэскэй олохпутун быһаарар киэҥ эйгэни таарыйар. 90-с сыллартан табаны иитиигэ уонна хотугу сир төрүт олохтоох аҕыйах ахсааннаах норуоттарыгар болҕомто ууруллубутугар сөпсөһөбүн.
Сокуону оҥорооччулар, толоруулаах уорганнар өттүлэриттэн бары хайысханан ыытыллар тэрээһиннэр табаһыттар үлэлиир усулуобуйаларын тупсарыыга ананар. Таба ахсаана билигин 80-с сыллардааҕар 2,5 төгүл аҕыйах, онон таба иитиитин салаатын бары хайысхаларын саҥардыахха, «РФ Сибиир уонна Уһук Илин төрүт олохтоох аҕыйах ахсааннаах норуоттарын судаарыстыбаннай өйөбүллэрин туһунан» федеральнай сокуон барыла Госдумаҕа көрүллэрэ тохтуллан турарын дьүүллэһиигэ төнүннэриэххэ наада. Ил Түмэн туһааннаах сис кэмитиэтэ былырыын бэлэмнээн оҥорбут «Хотугу дьиэ табатын туһунан» федеральнай сокуон барылын көҕүлээһинэ Госдумаҕа ылылларыгар саарбахтары үөскэтэр. Ол эрэн, табаһыттар федеральнай таһымҥа бигэргэнэрин кэтэһэллэр уонна эрэнэллэр, — диир вице-спикер Виктор Губарев.
— Өрөспүүбүлүкэҕэ кэнники уон сылга табаһыттар бырааптарын уонна интэриэстэрин көмүскүүргэ элбэх үлэ ыытылынна. Ол курдук, СӨ парламена уонна бырабыыталыстыбата 40-тан тахса сокуону уонна нуормалыыр аахталары оҥорбута. Ил Түмэн Өлөөн эбэҥки национальнай уонна Анаабыр национальнай (долган-эбэҥки) оройуоннарын курдук муниципальнай тэриллиилэр таһымнарыгар «Көс оскуола», «Көс дьиэ кэргэн» диэн өрөспүүбүлүкэтээҕи сокуоннары көҕүлээбитэ. Сыл ахсын өрөспүүбүлүктээҕи бүддьүөккэ «Табаһыттар көһө сылдьар олорор дьиэлэрэ» уонна «Табаһыттар маршруттарынан олорор дьиэлэри тутуу» өрөспүүбүлүкэтээҕи сокуоннарга олоҕуран үгүөрү үп-харчы көрүллэр, — диэн сис кэмитиэт бэрэссэдээтэлэ Елена Голомарева бэлиэтээтэ.
Санаттахха, кулун тутар 16-17 күннэригэр Нерюнгри куоракка уонна Иенгра эбэҥки сэлиэнньэтигэр Арассыыйа бэрэссэдээтэлистибэтин Аартыка Сэбиэтин 2021-2023 сс. былаанын чэрчитинэн, Саха Сиригэр бастакы Норуоттар икки ардыларынааҕы табаһыттар чөмпүйэнээттэрэ ыытыллыбыта. Чөмпүйэнээт Хотугу сир төрүт олохтоох аҕыйах ахсааннаах норуоттарын бэрэстэбиитэллэрин икки ардыларыгар ыкса сибээһи бөҕөргөтүүгэ, Аартыка сайдыытыгар инники кэскиллээх хардыыларын торумнуур сыаллаах-соруктаах буолбута.
-
0
-
0
-
0
-
0
-
0
-
0
