-- Стратегия Саха сирин Арктика эҥэрин мантан инньэ түһүмэҕинэн сайыннаран иһэргэ дириҥ суолталаах судаарыстыбаннай докумуон буолар. Хотугу оройуоннарбыт социальнай, бырамыысыланнай, транзитнай, экологическай уонна инновационнай хайысхаларын барытын хабан, киэҥ хабааннаахтык (комплекснайдык) сайыннарар бу кэскиллээх дьаһалы Саха сирэ Арассыыйа арктическай субъектарыттан биир бастакынан ылынна.
Бу докумуону 2 сылтан уһун кэм устата бэлэмнээбиппит. Онуоха учуонайдар, дьокутааттар, экспердэр, төрүт олохтоох омуктар түмсүүлэрэ -- бары кыттыһан, санаабытын үллэстэн, арктическай муниципальнай тэриллии бэрэстэбиитэллэрин кытта ырытан, сайдар тосхолу тобулбуппут. Стратегия сүрүн соруга -- нэһилиэнньэ олоҕун таһымын үрдэтии, олорорго бары өттүнэн табыгастаах усулуобуйаны тэрийии, үөрэхтээһин, култуура, медицина, социальнай эйгэлэри, төрүт хаһаайыстыбаны сайыннарыы. Маныаха Стратегия РФ Арктикаҕа туһуламмыт федеральнай докумуоннарыгар олоҕуран үлэлиэҕэ.
Саха сирин Арктикатааҕы түөлбэтин уратыта -- төрүт олохтоохторо бултаан-алтаан, балыктаан, таба иитэн, айылҕаттан аһаан-таҥнан олороллоро буолар. Ол иһин төрүт дьарыктарын сайыннаралларыгар сүрүн болҕомтобутун ууруохтаахпыт.
РФ Уһук Илин уонна Арктика сайдыыларыгар министиэристибэтэ аҕыйах ахсааннаах хотугу норуоттар айылҕа сирин баайын туһанар ыстандаары чопчулуур үлэни түмүктээн эрэр. Маны сэргэ төрүт олохтоохтор кэтэх хаһаайыстыбаларын өйүүр федеральнай бырагырааманы бэлэмнииллэр. Аны туран, Арктиканы сайыннарыы боппуруостарыгар сэбиэт тэриллэр.
Бу Стратегия арктическай улуустарга бырамыысыланнаһы күүскэ сайыннарарга кыаҕы биэрэр. Бүтүн кластердар баар буолуохтара. Оччоҕо дьиэ-уот, эбийиэктэр тутуллуохтара, суол-иис тупсуо, үлэ миэстэтэ бөҕө тахсыа, урбаан эйгэтэ сайдыа. «О государственной поддержке предпринимательской деятельности в Арктической зоне РФ» федеральнай сокуон төрүт олохтоох хотугу норуоттар резидент-урбаанньыт буолалларын боппот, төттөрүтүн биһириир.
Стратегия 2035 сылга диэри оҥоһулунна. Санаабытыгар, 2035 сыл наһаа ыраах курдук. Ол эрээри начаас элэҥнэтэн кэлиэ. Олохтоох нэһилиэнньэ бу Стратегия кимэн киирэр, түһүмэхтэринэн барар, кирбиилэри ылан иһэр кимиэллээх, кэскиллээх үлэтигэр билиҥҥиттэн кыттыһан барыахтара, -- диир норуот дьокутаата Елена Голомарева.
-
0
-
0
-
0
-
0
-
0
-
0
