– Саха сиригэр Чох хостооһун сайдыыта эрэгийиэн, Уһук Илин уонна бүтүн дойду экэниэмикэлэригэр улахан суолталаах – бу инфраструктураны тэрийиигэ, дьон олоҕун таһымын үрдэтиигэ туһалыа, бүддьүөккэ нолуоктан киирэр харчыны элбэтиэ. Ону тэҥэ бырамыысалыннас тэрилтэлэригэр олохтоох хаадырдары үлэлэтэргэ, ол инниттэн үрдүк квалификациялаах исписэлиистэри бэлэмнииргэ болҕомтону ууруох тустаахпыт, – диэн Ил Дархаммыт Айсен Николаев бэлиэтиир.
Санаттахха, «Якутуголь» уонна «Колмар» чох хостуур хампаанньалар кыттыылаах, үөрэхтээһин итиэннэ бырамыысалыннас уонна геология министиэристибэлэрэ өйөөһүннэринэн, Южно-Якутскай колледжка уонна өрөспүүбүлүкэ Эргиэн-бырамыысалыннас палаататыгар наадалаах хаадырдары бэлэмниир кластер үлэлиир.
Итинник бииргэ үлэлэһии исписэлиистэри бэлэмниир бырагырааманы үлэ биэрээччи наадатыгар сөп түбэһиннэрэн оҥорууну хааччыйар. Онон устудьуоннар үлэлиэхтээх тэрилтэлэригэр быһаччы быраактыкаларын бараллар уонна үлэ үөрүйэҕин баһылыыллар. Итиэннэ өрөспүүбүлүкэҕэ орто анал үөрэхтээх исписэлиистэргэ сыаллаах миэстэни биэрэн өйүүр ньымалар бааллар.
– Эрэгийиэҥҥэ үлэлиир, дохуоттанар, барыс ылар хампаанньаларга олохтоох нэһилиэнньэни үлэҕэ ылыы бастакы миэстэҕэ турар. Өрөспүүбүлүкэ онно бэлэм уонна бырамыысалыннаска наадалаах хаадырдары бэлэмнииргэ үлэни ыытар, – диэтэ тустаах министиэристибэ салайааччыта Максим Терещенко.
Бырамыысалыннас уонна геология министиэристибэтин дааннайдарынан, сыл түмүгэр 30 мөл.туонна чох хостоноро былааннанар. Бу Саха сирин чох хостооһунун историятыгар саҥа рекорд буолуон сөп. Бүтэһик көрдөрүүгэ – 2021 сыл тохсунньутуттан балаҕан ыйыгар диэри 21 мөл.туонна чох хостоммут. Оттон ааспыт, 2020 сылга, хостооһун уопсай таһыма 20,1 мөл. туонна буолбута.
-
0
-
0
-
0
-
0
-
0
-
0
