Амма улууһун «Амма олоҕо» хаһыат саайтыгар көрсүһүүгэ кыттыбыт дьон эппиттэринэн, улахан суолталаах кэпсэтии тахсыбыт.
"Икки сыллааҕыта ыаллыы сытар Мэҥэ Хаҥалас Чыамайыкытыгар алмаас хостооһуна саҕаланар үһү диэн сурах элбэх киһи утуйар уутун аймаабыта. Кэм, сыл ааһан истэҕин ахсын айдаан намыраабыт курдук эрээри, тустаах дьон — олохтоох бэйэни салайыныы уорганнарын үлэһиттэрэ, общественнай экологтар бу боппуруоһу харахтарын далыттан сүтэрбэттэр. Ол курдук, тохсунньу 24 күнүгэр Амма улууһун делегацията Ил Түмэн судаарыстыбаннай мунньах, экология министиэристибэтин, «Якутскгеология» АУо уонна үс ыаллыы нэһилиэк бэрэстэбиитэллэрэ кыттыылаах мунньахха кыттыыны ыллылар.
«Якутскгеология» тэрилтэ алмаас саппааһын үөрэтэн көрөр, көрдүүр үлэтин сырдатар мунньахха Амма улууһун депутаттарын Сэбиэтин бэрэссэдээтэлэ Владимир Колосов, депутат Анатолий Федоров уонна «Амманы харыстыаҕыҥ» общественнай түмсүү актыбыыһа Алена Егорова кыттыыны ыллылар.
Ил Түмэн сир сыһыаннаһыыларыгар, экологияҕа уонна сир баайын туһаныыга сис кэмитиэтин бэрэссэдээтэлэ Андрей Находкин, Амма-Майскай быыбардыыр учаастактан дьокутааппыт Александр Корякин уонна Амма улууһун дьаһалтата экология боппуруостарыгар бииргэ үлэлэһиигэ сөбүлэҥнээх буоламмыт мунньахха кыттар ыҥырыы тутан баран кыттан кэллибит. Элбэх киһи, нэһилиэнньэ кыттыылаах мунньаха иһитиннэрбиттэринэн, «Якутскгеология» АУо чинчийэр үлэлэри 2024 сылтан ыытан саҕалаабыт. 47 буровой скважина оҥорон, ону чинчийэн ханнык кимберлитовай туруупка промышленнай кээмэйгэ эппиэттэһэрин чуолкайдыахтаахтар. Ол түмүгүнэн 2027 сылга отчуот түмүллүөхтээх. Бу чинчийэн, үөрэтэн көрүү түмүгүнэн алмааһы хостооһун саҕаланар түгэнигэр 5-10 сыл иһинэн үлэ саҕаланыан сөп диэн иһитиннэрдилэр. Онон билиҥҥитэ Чыамайыкы сиригэр-уотугар промышленнай үлэ саҕаланыа, эбэтэр саҕаланыа суоҕа диэн этэр эрдэ,- диэн Владимир Владимирович сырдатар.
Үөрэтэр, чинчийэр үлэлэр тиэхиньикэ кыамтатыттан сир тоҥугар, алтынньыттан саҕалаан кулун тутар ыйдарга ыытыллаллар, сайынын квадрокоптерынан, квадроциклынан эрэ кэтээн көрүү барар. Чинчийии үлэлэрэ 2755 кв.м. иэннээх сиргэ Амма, Мэҥэ Хаҥалас уонна Хаҥалас улуустарын территорияларын таарыйар.
-Онон үс улуус кыттыһан экологическэй Сэбиэт тэринэн ыытыллар үлэлэри хонтуруоллуурбут наада диэн түмүккэ кэллибит. Барыбытын долгутар — Таҥха үрэҕинэн үлэлэр ыытыллыахтара дуо диэн ыйытыы биэрбиппитигэр сибилигин этэр кыах суох диэн эппиэттээтилэр. Ити этиллибит 47 скважина ханан оҥоһуллара чинчийии эрэ түмүгүнэн чуолкайданыахтаах. Онон үлэ хайдах баран иһэрин, хаамыытын нэһилиэнньэҕэ биллэрэ туруохпут, общественнай экологтар, активистар көмөлөрүнэн хонтуруолга тутуохпут,- диэн депутаттар Сэбиэттэрин бэрэссэдээтэлэ эбэн этэр".
Оттон Мэҥэ-Хаҥалас улууһун баһылыга Дмитрий Тихонов телеграм ханаалыгар тохсунньу 24 күнүгэр, сиртэн хостонор баайы чинчийии үлэлэрин тула Чыамайыкы нэһилиэгин олохтоохторун кытта атах тэпсэн олорон кэпсэттибит диэн иһитиннэрэр.
Салгыы кини бу көрсүһүүгэ Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, Саха Өрөспүүбүлүкэтин бырамыысаланнаһын уонна геологиятын миниистирин солбуйааччы Андрей Сычевскай, Саха Өрөспүүбүлүкэтин экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Николай Додохов, «Якутскгеология» тэрилтэ эппиэттээх үлэһиттэрэ, ыаллыы Амма улууһуттан улуус салалтата, уопсастыбанньыктар кыттыыны ыллылар диэн чопчулуур
Бу сылларга «Якутскгеология» тэрилтэ Чыамайыкы сиригэр-уотугар чиничийии үлэтин ыытар. Былаан быһыытынан миэстэтигэр ыытыллар үлэ 2026 сылга түмүктэниэҕэ, ол кэннэ ылыллыбыт матырыйаалы салгыы үөрэтэн, чинчийэн, быһа холоон 2030 сыллаахха бу бырайыак экономика өттүнэн төһө туруктааҕын ааҕан-суоттаан, түмүк тахсарын туһунан «Якутскгеология» салайааччы дириэктэрэ Алексей Андреев иһитиннэрии оҥордо диэн бэлиэтиир.
Мунньах сүнньүнэн олохтоохтортон киирбит ыйытыктарга хоруйдаатылар. Маны таһынан мустубут дьон тайаҕы бултааһын сиэрэ суох элбээбитин, манна хонтуруол күүһүрэрэ наадатын, олохтоох нэһилиэнньэ санаата, этиитэ булбулт болдьоҕор учуоттаныахтааҕын туһунан этиннилэр.
Түмүккэ киирбит этиилэргэ олоҕуран ыытылла турар үлэлэргэ уопсастыбаннай хонтуруолу олохтуур итиэннэ маннык көрсүһүүлэри сылын ахсын тэрийэн ыытар туһунан быһаарыы ылылынна диэн түмүктүүр.
Хаартыска: «Амма олоҕо» хаһыат.
-
1
-
0
-
0
-
0
-
0
-
0