Сааскы халаан ылар сирин уратытык туһаныллар сир быһыытынан докумуоҥҥа киллэриллэр. Нэһилиэнньэлээх пуун сайдыытын былааныгар ол барыта учуоттаныллар. Уу ылар сирин сүүһүнэн сыл устата кэтээн көрүүнэн быһаарыллар, тоҕо диэтэххэ, кыраныыссаны сыыһа оҥоруу, быһаарыы улахан хоромньуга тиэрдиэн сөп.
Халаан уутун хоромньутун аҕыйатар сыалтан 2014 сыллаахха муус устар 18 күнүгэр РФ Бырабыыталыстыбатын «Уу ылар сирдэрин кыраныыссаларын быһаарыы туһунан» уурааҕа тахсыбыта. Барыллаан суоттааһыҥҥа олоҕуран, 100 сылга биирдэ ууга барар сирдэр, ууга барар түөлбэлэр диэн олохтоммуттара. Маннык сирдэргэ саҥа нэһилиэктэр үөскүүллэрэ уонна саҥа дьиэлэр тутуллаллара кытаанахтык бобуллар. Итинник уу ылар сирдэригэр харыстыыр инженернэй эбийиэктэр тутуллаллар.
Бу күһүн Уу ресурсаларын федеральнай агентствотын Өлүөнэ сүнньүнээҕи ууга салалтата ууга барар уонна ууга тимирэр учаастактары быһаарарга улахан үлэни ыытта. Саха сиригэр уопсайа 123 нэһилиэнньэлээх пуун ууга барар түөлбэ реестрин испииһэгэр киллэрилиннэ. Испииһэк Уу ресурсаларын федеральнай агентствотын Өлүөнэ сүнньүнээҕи ууга салалтатын сайтыгар (lbvu.ru) баар. Анал испииһэк оҥоһулларыгар СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин дааннайдара уонна олохтоох бэйэни салайыныы уорганнарын үлэлэрэ туһанылыннылар. Бу испииһэк Росприроднадзор, Росгидромет, Росреестр сөбүлэҥин ааспыттара.
Алтынньы туругунан Уу ресурсаларын федеральнай агентствотын Өлүөнэ сүнньүнээҕи ууга салалтата бу дааннайдары судаарыстыбаннай уу реестригэр киллэрдэ. Онон саҥа сири, учаастагы ылыан баҕарар киһи үөһэ ыйыллыбыт тэрилтэ саайтыгар киирэн көрүөн сөп.
РФ Уу кодексатын 67.1 ыстатыйатыгар олоҕуран, бу ыйыллыбыт ураты түөлбэлэргэ территориялары былааннааһын, тутууну ыытыы кытаанахтык бобуллар. Бу сирдэргэ нэһилиэнньэлээх пууннары тэрийэр, хапытаалынай тутууну ыытар көҥүллэммэтин нэһилиэк баһылыктара уонна олохтоохтор булгуччу тутуһуохтаахтар. Сир ылар киһи эрдэттэн ханнык сиргэ хапытаалынай дьиэ-уот туттарын билиэхтээх. Тутууну былаанныыр, сир атыылаһар саҕана бу боппуруоска болҕомтолоох буоларгытыгар ыҥырабыт.
Уу ылар уонна ууга тимирэр сирдэр испииһэктэрэ: http://lbvu.ru/deyatelnost/spisok-ustanovlennyh-zon-zatopleniya-na-28-04-2020/
Өлүөнэ сүнньүнээҕи ууга салалтатын пресс-сулууспата.
- 0
- 0
- 0
- 0
- 0
- 0