Тутуу

7 дьиэ үлэҕэ киирдэ

Лия Шайнурова,  “Өрөспүүбүлүкэтээҕи ипэтиэкэ ааҕыныстыбата (РИА)” АУо генеральнай дириэктэрэ:

- «Звезднай түөлбэ С секторыгар уопсайа 10 дьиэ тутулла турар, күн бүгүн 7 дьиэ үлэҕэ киирэн, дьоҥҥо кыбартыыраларын туттарабыт. Өрөмүөн оҥостор наадата суох, кыбартыыралар дьон көһөн киирэригэр бэлэмнэр, обуой, сантехника, линолеум, куукунаҕа раковина уонна билиитэлээх оһох, розетка, лаампа барыта баар. Манна сорох дьон дьиэни атыылаһан ылбыттара уонна кыбартыыралары хаарбах дьиэттэн көһөрүү бырагырааматынан биэрэбит. Дьокуускайтан эрэ буолбакка, Аартыка улуустарыттан кытта хаарбах дьиэттэн көһөн кэлэллэр.

Бырагыраама чэрчитинэн кинилэр улуустарыгар эрэ буолбакка, куоракка эмиэ дьиэни ылыахтарын сөп. Киин куораттан 17,4,2 кыбаарталлар олохтоохторо көһүөхтэрэ, ол миэстэтигэр «Спортивнай» саҥа түөлбэҕэ 5-9-12-лии этээстээх дьиэлэр дьэндэйэн тахсыахтара.

Киэҥ хабааннаах инвестиция бырайыага буоларын быһыытынан, Звезднайга дьон олороругар табыгастаах усулуобуйа тэриллиэҕэ, оҕо, успуорт былаһааккалара, сылаас гараас тутуллуоҕа. Дьокуускай куорат дьаһалтата былырыын тутуллубут А секторга киирэргэ суолу аспааллыаҕа, эһиил түөлбэҕэ суол-иис бүтүннүү оҥоһуллуохтаах», — диэн кини көрдөрө сылдьан кэпсээтэ.

1392 кыбартыыраттан 500 хаарбах дьиэттэн көһөр дьоҥҥо бэриллиэҕэ, 17 кыбаартал олохтоохторугар 200 кыбартыыра көрүллүбүт, атына атыыга тахсыаҕа.

Икки оскуола уонна уһуйаан

Түөлбэҕэ 990 миэстэлээх оскуола тутулла турар, куоракка улахан иэннээх бу үһүс оскуола, итиэннэ 315 миэстэлээх уһуйаан тутуллар. Бу икки эбийиэги 2025 с. туттарыахтара. Ону таһынан, поликлиника бырайыага оҥоһуллар, эбийиэк 2026 с.  үлэҕэ киириэхтээх, итиэннэ бүрүөһүннээх каток, искибиэр, паарка тутуллуохтаах. Онон түөлбэттэн тахсыбакка эрэ дьон наадыйара барыта тэриллиэҕэ.

Быйыл Өрөспүүбүлүкэтээҕи ипэтиэкэ ааҕыныстыбата салгыы С сектор иккис түһүмэҕин салгыы тутуохтаах. Онно 15 дьиэ дьэндэйэн тахсыаҕа. Үһүс түмүктүүр түһүмэх быһыытынан, В сектор тутуллуоҕа, онно туһунан уһуйаан, оскуола үлэҕэ киириэҕэ. Звезднайга уопсайа 30 элбэх кыбартыыралаах дьиэ, алта таунхаус баар буолуоҕа.

Түөлбэни уунан, итиинэн хааччыйар хочуолунай тутуллан, быйыл үлэҕэ киириэхтээх. Инникитин ДСК уонна Ильинка эмиэ бу саҥа хочуолунайга холбонуохтаахтар. Түөлбэҕэ баар ититии ситимэ сир аннынан барар, онтон уулуссаҕа таҕыстаҕына үөһэ тахсар.

Звезднайга атыыланар дьиэ биир кв.м. сыаната 145 тыһ. солк. саҕаланар, куорат атын оройуоннарын кытта тэҥнээтэххэ, кытыы сир буолан, сыаната удамыр. Студияттан саҕалаан, 1-2-3 хостоох кыбартыыралар бааллар. Саамай кыра иэннээх кыбартыыра нуормалааһын ирдэбилинэн 28 кв.м., улахан иэннээх кыбартыыра 85 кв. м. үөһэ. Түөлбэҕэ төгүрүччү эргийэ сылдьан киирэр суол тутуллуохтаах, массыына  турар парковката, хас даҕаны оптуобус тохтобула оҥоһуллуохтаах, от-мас, сибэкки олордуохтара. Манна маҕаһыыннар, аптека, парикмахерскай о.д.а. аһыллыахтара. 

Бастакы этээскэ тутааччылар сылаас муостаны тэлгииллэр, онон кыһын тымныыга олохтоохтор тоҥуохтара суоҕа.  С сектор А-тан уратыта диэн балкуоннар өстүөкүлэ бүрүөһүннээхтэр.

Дьиэлэр 5 сыл мэктиэлэнэр болдьохтоохтор, олохтоохтор ити ыйыллыбыт болдьох иһигэр көстүбүт итэҕэһи-быһаҕаһы босхо көннөттөрүөхтэрин сөп. Салгыы Звезднайга куорат 2Б кыбаарталыгар баар 23 хаарбах дьиэттэн көһүөхтээх дьоҥҥо дьиэ бэлэмниэхтэрэ.

Звезднай саҥа тутулларыгар үгүс дьон ДСК түгэҕэр, ханна эрэ ып-ыраах көһөн барыахтарын баҕарбат этилэр, онтон улахан оскуола, уһуйаан тутулларын көрөн баран, санаалара уларыйда. 17 кыбаарталга баар 5 хаарбах дьиэ олохтоохторун аҥаардара манна көһөн кэлэргэ бэлэмнэрин биллэрбиттэр.

Бу эргин олорор дьон үлэлэригэр 7 ч. туран айанныахтарын наада, Михаил Николаев проспегар Прометейга эмиэ элбэх киһи олорор буолан, массыына сатыы киһи хаамарынааҕар бытааннык айанныыр. Биир өттүнэн олохтоохтор кытыы сир салгына ырааһын, чуумпутун бэлиэтииллэр.

“Өрөспүүбүлүкэтээҕи ипэтиэкэ ааҕыныстыбата (РИА)” АУо тутар хампаанньа пресс-сулууспатын хаартыскалара.