«Амма» өрөспүүбүлүкэ суолун Майа-Амма икки ардынааҕы учаастагын аспаалынан бүрүйүү 2028 сылга түмүктүөхпүт диэн Саха Өрөспүүбүлүкэтин Ил Дархана Айсен Николаев «Прямой разговор» биэрии кэмигэр иһитиннэрдэ.
Бу сылга «Амма» өрөспүүбүлүкэтээҕи трасса суолуттан өссө 10 км аспаалынан бүрүйүөхтэрэ. Былырыын «Куттала суох уонна хаачыстыбалаах суоллар» национальнай бырайыагынан аспаал ууруллубута. Ол курдук, 2024 сыл атырдьах ыйын 26 күнүн сарсыардатыгар Амматтан Дьокуускайдыыр суол 155 км. (Дьокуускайтан Аммаҕа барыынан ааҕыллар, Амматтан 23-30 км.) учаастагар аспаалы ууруу үлэтэ үөрүүлээхтик саҕаламмыта. Амма улууһун олохтоохторугар эрэ буолбакка, бүтүн Саха сирин дьонун-сэргэтин үөрүүлээх түгэнигэр Ил Дархан Айсен Николаев кыттыыны ылбытын санатыахха сөп.
«Үлэ манан тохтообот, быйыл өссө 10 км аспааллыыр сорук баар. 2028 сылга диэри үлэ түмүктэнэригэр, суол сылы эргиччи сырыылаах буоларыгар эрэнэбин», — диэтэ Ил Дархан.
Билигин Аллараа Бэстээхтэн Майаҕа диэри суол уруккуттан аспаллаанан, салгыы 159 км кытаанах бүрүөһүнүнэн сабыллыахтаах. Уоспайынан бу үлэҕэ барыта 17 млрд. солк. үп көрүллэрэ былааннанар.
Хаартыска: "Амма олоҕо" хаһыат
-
2
-
0
-
0
-
0
-
0
-
0
