Улуу Өлүөнэ муостатын тутуу хаамыыта өрөспүүбүлүкэ парламенын болҕомтотугар турар сүрүн эбийиэгинэн буолар. Ол курдук, бу сүдү суолталаах тутууну ыытыыга сыһыаннаах хайысханы парламеҥҥа Ил Түмэн бэрэссэдээтэлин солбуйааччы, бүддьүөккэ, үпкэ, түһээн уонна сыана бэлиитикэтигэр, бас билии уонна приватизация боппуруостарыгар сис кэмитиэт бэрэссэдээтэлэ Юрий Николаев иилээн-саҕалаан ыытар, хонтуруоллуур.
От ыйын саҥатыгар Ил Түмэҥҥэ муостаны тутуу боппуруоһунан тэрээһин мунньахха кэккэ этиилэр киирбиттэрэ. Ол курдук, экэниэмикэ, инбэстииссийэ уонна бырамыысыланнас бэлиитикэтигэр сис кэмитиэт (бэрэссээдээтэл Павел Петров) аны күһүҥҥү сиэссийэ кэмигэр тутууга, олох-дьаһах хомунаалынай хаһаайыстыбатыгар уонна энэргиэтикэҕэ сис кэмитиэтэ (бэрэссэдээтэл Александр Корякин) кыттыылаах Бырабыыталыстыба чааһын ыыталларыгар этии киирбитэ.
Ол чэрчитинэн уонна ыытыллар үлэ-хамнас туругун көрө-истэ, тутуу хаамыытын билсиһэ соторутааҕыта сис кэмитиэттэр бэрэссэдээтэллэрэ Павел Петров уонна Александр Корякин Өлүөнэ муостатын тутуу былаһааккатыгар сырыттылар. Норуот итэҕэллээхтэригэр билиҥҥи балаһыанньаны Өлүөнэ муостатын тутуу дириэксийэтин салайааччыта Артем Артемьев билиһиннэрдэ уонна бу эбийиэк инсэниэринэй өртүнэн олус үрдүк таһымнаах үлэни ирдиирин, ону тэҥэ өрөспүүбүлүкэҕэ тырааныспар инфраструктуратын сүрүн ситиминэн буоларын тоһоҕолоон бэлиэтээтэ.
Бастакы коффердамы таҥыы түмүктэнэн эрэр, чопчу манна 250 исписэлиис үлэлэһэр. Быһаарар буоллахха, коффердам – 17 миэтэрэ үрдүктээх, диаметрынан 36 миэтэрэлээх сыбааркаланан, таҥыллан хомуллубут баараҕай тутуу. Ону устар тэриллэргэ ууран, сүрүн үөскэ киллэрэн туруорар соруктаахтар. Эбэ үөһүгэр маннык 3 коффердамы туруоруохтаахтар. Бу коффердамнары туһанан муоста сүрүн үөскэ турар киин тирэхтэрин фундаменнарын оҥорорго анаан кураанах зоналары таһаарыахтаахтар.
- Тутуу күүскэ бара турарын көрөн итэҕэйдибит. Өлүөнэ муостата– Саха Сиригэр эрэ буолбакка, Арассыыйаҕа кытта саҥа, сэдэх тутуу. Арассыыйаҕа муоста тутуутугар саҥа туттуллар бастакы коффердам кэлэр атырдьах ыйыгар эбэ үөһүгэр туруоруллуута сүдү суолталаах буолуоҕа. Муостаны тутар исписэлиистэр олорор усулуобуйаларын көрдүбүт. Уопсайа 1500-тан ордук киһи үлэнэн хааччыллыахтаах. Бу чэрчитинэн олохтоох каадырдары үлэҕэ тардыы боппуруоһун көрдүбүт, -диэн норуот дьокутааттара бэлиэтээтилэр. Ону тэҥэ, тутуу бары түһүмэхтэригэр аныгы технологиялары тутталларын сэргии көрбүттэрин уонна үлэ тэрээһинэ үрдүк таһымнааҕын эттилэр. Ол курдук, билигин хаҥас кытылга 3 тирэххэ анаан 70 сыбаайа туруоруллубут, уҥа кытылга эмиэ үлэ ыытыллар. Иккис коффердамы тутуу кэлэр сезоҥҥа саҕаланыаҕа диэн тутааччылар быһаардылар.
Санатар буоллахха, бэс ыйыгар ыытыллыбыт Ил Түмэн уочараттаах 13 сиэссийэтигэр дьокутаат Нюргуяна Заморщикова муоста тутуутун туһунан боппуруоһу көтөхпүтүгэр СӨ тырааныспарга уонна суол хаһаайыстыбатыгар миниистирэ Владимир Сивцев 2024 сыл алтынньы ыйыттан муостаны тутуу иккис түһүмэҕэ саҕаламмытын, билигин эбийиэги тутуу уопсай кээмэйиттэн 4,9 % бэлэмин туһунан хоруйдаабыта.
Бэлэмнээтэ Алексей МАТВЕЕВ
Хаартыскалар Василий Кононов (Ил Түмэн) түһэриилэрэ
-
2
-
0
-
0
-
0
-
0
-
0
