Тутуу

Михаил Романович үйэтин тухары салайар үлэҕэ үлэлээбитэ, бу дойдуттан барыар диэри олоҕун бүүс-бүтүннүү социальнай эбийиэктэри, өрөспүүбүлүкэ сүрүн хорук тымырдарын, илин эҥэргэ, Бүлүү бөлөх улуустарыгар аспааллаах суол тутуутугар, дьон олоҕун тупсарарга анаабыта.

Кини салалтатынан өрөспүүбүлүкэҕэ киһи ааҕан сиппэт үгүс-үтүмэн суол-иис тутулунна, Алдаҥҥа, Бүлүүгэ, Ньурбаҕа, Халымаҕа федеральнай айан суоллара оҥоһулуннулар. Марха өрүһү, Түүкээни туоруур муостаҕа киирэр суол аспаалламмыта.

Олоҕун устатын тухары араас ыһыахтарга, спортивнай, култуурунай тэрээһиннэргэ үгүстүк меценаттаабыт, бириис булан биэрбит, биир дойдулаахтарыгар кыһалҕалаах кэмҥэ көмөлөспүт, оскуола-балыыһа тутан биэрбит тапталлаах төрөөбүт дойдутун Уус Алдан улууһун дьаһалтата киниэхэ махтанан туран Бороҕоҥҥо баар уулуссаны Михаил Романович аатынан ааттаабыта.

Онтон санаалара кынаттанан кэргэнэ Полина Ивановна, оҕолоро Алена уонна Иван тутааччы идэлээх, олоҕу тупсарааччы аналлаах аҕаларын аатын үйэтитэн, искибиэр тутарга санаммыттара. Бэртээхэй искибиэр Бороҕон илин өттүгэр Тоһоҕо күөлүн үрдүгэр аҕаларын төрөөбүт күнүгэр, атырдьах ыйын 24 күнүгэр аһылынна.

Мүрү киэҥ алааһыгар күн сырдык сардаҥаларынан күөл көҕөрүмтүйэр ньууругар күлүмүрдүү оонньуур кэрэ көстүүтүн утары оҕо-аймах, дьон сынньанарыгар икки хачыал, ыскамыайка туруорулунна. Михаил Романович пааматынньыгын икки өттүгэр истиэндэлэр бааллар, биирэ дьиэ кэргэнин, иккиһэ олоҕун тутууга анаабыт үлэтин сүрүн кэрчиктэрин хаартыскаларынан кэпсииллэр.  

Тэрээһиҥҥэ дьиэ кэргэнин, аймахтарын таһынан, уопсайа 100 тахса киһи сырытта, куораттан бииргэ үлэлээбит, алтыспыт дьоно таҕыстылар. Кини дьоҥҥо оҥорбут үтүөтэ эргиллэн, таджиктар биригээдэлэрэ муостатын, бииргэ үлэлэспит дьоно уотун босхо оҥордулар. Атын тэрилтэлэр Михаил Романович спонсордыыр оскуолаларыгар ноутбук бэлэхтээтилэр.

«Биһиги аҕабыт уолун Иваны, аймах уолаттарын эрэ буолбакка, улууска, өрөспүүбүлүкэҕэ элбэх киһини тутааччы сыралаах идэтигэр уһуйда. Киниттэн үөрэнэн, элбэх саха, нуучча, атын да омук дьоно олохпут сүрүн хорук тымырын, суолу-ииһи оҥорор, таҥар тутааччы буолбуттара.

Элбэх оҕону-ыччаты иитэн-үөрэтэн, такайан таһаарбытын кэриэстээн, искибиэр ортотугар пааматынньыгар оҕону кытта олорорун оҥордулар. Эдэр дьоҥҥо, уолаттарга үтүөлээх тутааччы быһыытынан холобур буоларын кэрэһилээн», — диэн кэпсиир кэргэнэ Полина Ивановна.

Кини Готовцевтар дьиэ кэргэттэрин аатыттан Уус Алдан, Мүрү нэһилиэгин дьаһалтатыгар, аҕаларын аатын үйэтитэргэ үгүстүк сүүрбүт-көппүт оҕолоругар, аймахтарыгар Анастасия Саввична уонна Федор Федорович Татариновтар дьиэ кэргэттэригэр махтанар.

Михаил Романович кэргэнин Полина Ивановнаны кытта оскуолаҕа биир кылааска үөрэммиттэрэ, устуодьуоннуу сылдьан бастакы тапталларынан ыал буолан, талбыт курдук кыыс-уол оҕолонон, сүрэҕи сылаанньытар, дууһаны үөрдэр сиэннэрдэнэн, 46 сыл бииргэ олордулар.

Тапталлаах аҕаларын, эһэлэрин пааматынньыгын талааннаах тарбахтаах скульптордар: Петр Иннокентьевич Эляков, Владислав Александрович Бурцев, Владимир Степанович Левин чочуйан таһаардылар. Искибиэри бэйэтин баҕа санаатынан, аҕаларыгар улахан махталлаах Алиакбар Эмомуддинович Хайриддинов биригээдэтэ оҥордо. Уотун Юрий Иванович Игнатьев дириэктирдээх "Техэлектроснаб" тэрилтэ киллэрдэ.