Марина Силкина өрөспүүбүлүкэ үрдүнэн дьон-сэргэ олоҕун тупсарарга аналлаах 15 федеральнай уонна 3 эрэгийиэннээҕи бырайыактары олоххо киллэрии бара турарын уонна балар элбэх дьон кыһалҕаларын быһаарыыга аналлаахтарын туһунан иһитиннэрдэ.
Сүрүн иһитиннэриини Саха сирин кылаабынай архитектора Ирина Алексеева оҥороругар, 2019-2020 сс. тустаах баартыйа бырайыагын чэрчитинэн, 23 саҥа уопсастыбаннай территория уонна 37 муниципальнай тэриллиигэ 80 былаһаакка саҥардыллан тутуллубут. Итини ситиһэргэ федеральнай бүддьүөттэн 693,8 мөл. солк, өрөспүүбүлүкэттэн 49,2 мөл. солк. уонна улуустартан 106,5 мөл. солк. көрүллүбүт. Бүтүн Арассыыйатааҕы «Куорат эйгэтин” оҥорууга бастыҥ бырайыактары талар куонкуруска 2018 сылллаахха Өлүөхүмэ, Ньурба уонна Покровскай куораттар бастаабыттар.
Санатар буоллахха, Ил Дархан Айсен Николаев быһаччы дьаһалынан, нэһилиэктэргэ анаан дизайн-код оҥоһуллубута уонна ити бастакынан Горнай улууһун Бэрдьигэстээх сэлиэнньэтигэр «Эйгэ» сквери тутууга туһаныллыбыта.
Салгыы Бэрдьигэстээх сэлиэнньэтин баһылыга Алексей Аргунов, Ленскэй куорат баһылыга Николай Хорунов, Орто Халыма куорат баһылыга Николай Чукров бырайыак үбүлэнэр механизмын, куонкуруска хайдах кыттыбыттарын, инники өттүгэр туох былааннаахтарын кэпсээтилэр. Николай Хорунов Ил Түмэҥҥэ тупсаран оҥоруу боппуруоһун биир кэлимник көрөллөрүгэр этии киллэрдэ.
Ил Түмэҥҥэ «Биир ньыгыл Арассыыйа» баартыйа фракциятын салайааччы, Ил Түмэн Бэрэссэдээтэлин солбуйааччы Антонина Григорьева элбэх үлэ ыытыллыбытын уонна бу бырайыак дьону түмпүтүн тоһоҕолоон бэлиэтээтэ. Итини тэҥэ, тупсаҕайдык олоруу эйгэ бырайыага сокуон таһымынан өссө да бэрээдэктэнэ илигин этэн туран, Ленскэй куорат баһылыга Николай Хорунов бырайыагы атын бырагыраамалар тэрээһиннэрин кытта дьүөрэлии тутан үлэлэтэр туһунан этиитин өйүүрүн биллэрдэ. Антонина Афанасьевна фракция ахсынньыга бырайыак боппуруостарын быһаарыыга министиэристибэлэр, биэдэмистибэлэр кыттыылаах «төгүрүк остуолу» тэрийиэхтээҕин уонна куораттар эйгэлэрин уларыйыыларын биир кэлимник көрөн чинчийии, ырытыы, анаалыстааһын ыытыллыбатын иһитиннэрдэ. Антонина Григорьева дьокутааттар куорпустарын ааттарыттан «Куорат эйгэтэ” бырайыагы олоххо киллэриигэ үлэлээбит муниципальнай тэриллиилэр баһылыктарыгар махтал тылларын эттэ. Өлүөхүмэ, Бүлүү уонна Дьокуускай куораттар баһылыктарыгар историческай статуһу ыларга сөптөөх үлэни ыыталларыгар ыйда. Ити ситиһилиннэҕинэ, үбүлээһин кээписиэнэ үрдүөхтээх. 1970 сс. эргин Өлүөхүмэ, Бүлүү уонна Дьокуускай историческай статустаахтара.
-
0
-
0
-
0
-
0
-
0
-
0
