Тутуу

Суруналыыстыка эйгэтигэр В.В.Никифоров-Күлүмнүүр аатынан бириэмийэ лауреата, СӨ култууратын үтүөлээх үлэһитэ Иван Ушницкай санаатын үллэһиннэ:

--Ойуунускай курдук улуу дьоммутун биһиги төрөөбүт эрэ күннэригэр буолбакка, ханнык баҕарар түгэҥҥэ саныах тустаахпыт. Кинилэр үлэлээбит үлэлэрин, олорбут олохторун холобур оҥостон, айымньыларын, бөлүһүөктээһиннэрин илдьиритэн ырытан, бараммат баай тылларын иҥэринэн, саха норуотун сайыннарыыга туһаныахтаахпыт.

Бэйэм түбэһэн истибэккэ быһыылаах, ханна туох тэрээһин буоларын билбэккэ, тугу да оҥорботулар дии санаан, кыратык хомойуохча буолбутум. Арай киэһэ эмискэ ютубка доҕорум Николай Ефимович Попов видеота тахсыбытын көрдүм.

Николай Ефимович Чөркөөхтөөҕү мусуой-комплекс дириэктэрэ, кинилиин саха улуу дьонун туһунан тапсан кэпсэтээччибит. Онон сир түннүгэ киһи тугу эрэ сонуну, дьиктини, кэрэни кэпсээри гынна быһыылаах диэн, видеотын арыйан көрдүм. Дьэ, доҕоор, үөрүүлээх сонуну иһиттим -- Ойуунускай үөрэммит оскуолатын өрөмүөннэппиттэр! Бу сөргүтүү үлэтин дьокутаат Виктор Николаевич Лебедев үбүлээбитин билэн, өссө эбии үөрдүм!

Тута Виктор Николаевичка эҕэрдэлээн эрийдим. Мин кинини 15 саастааҕыттан, “Азия оҕолоро” оонньууларга бастыаҕыттан, үчүгэйдик билсэбин. Хас биирдии тустуукка картотекалаахпын, онтукабын байытаары, сөп буола-буола эрийэн кэпсэтэбин. “Улахан дьыаланы оҥорбуккун”, -- диэн махтанным.

Николай Ефимович бу оскуоланы өрөмүөннэтээри, элбэх сиргэ туруорсубут эбит. Ону үбүлээһинин кыайан быһаарбакка сылдьыбыттар. Хата, Виктор Николаевич мусуойу көрөн баран, Николай Ефимовичка: “Мин көмөлөһүөм”, -- диэбит.  Ону, хайдах эрэ, мин табаарыһым бастаан соччо итэҕэйбэтэх курдук туттубут. Оттон сотору буолаат, маһын тастаран, маастардары булан, үлэни саҕалаабыттарыгар, Николай Ефимович соһуйбут уонна олус үөрбүт.

Ойуунускай төрөөбүт күнүгэр саха норуотугар бу улахан бэлэх буолла. Үйэлээх бэлэҕи биһиги чулуу спортсмеммыт, улахан тэрилтэ салайааччыта, Ил Түмэн дьокутаата Виктор Лебедев оҥордо.  

Бу историческай суолталаах оскуолаҕа оҕолорбут экскурсияҕа сылдьыахтара, улуу киһибит хайдах олорбутун, үөрэммитин көрүөхтэрэ. Билигин оҕо үксэ килэйэн-халайан киэҥ-куоҥ оскуолаҕа үөрэнэр. Оттон Ойуунускай бу курдук кыараҕас, кыра оскуолаҕа үөрэнэн, олоххо, сырдыкка тардыһыылаах буолан, норуот киэн туттар киһитэ буола үүммүтүн өйдүөхтэрэ. Онон Виктор Николаевич үйэлээх үлэни оҥорботугар өссө төгүл махтанабын!