Тыа хаһаайыстыбатын министиэристибэтин ааҕыытынан, 57 тыһ. тонна үүт соҕотуопкатын былаана тиэрдиллэн, онно анаан 2,5 млрд. солк. субсидия көрүллүбүтэ. Маны таһынан, ыанар ынах төбөтүгэр 35 тыһ. солк. суоттанан 1,5 млрд. солк. бэриллэрэ быһаарыллыбыта. Бу Ил Дархан кэтэх ыалы өйүүр мэхэньииһимин туһунан өрөспүүбүлүкэ үрдүнэн араас кэпсэтиилэр, боппуруостар үөскээн сылдьыбыттара. Кэтэх ыал 35 тыһ. солк. ыларыгар сир, нолуок боппуруостара күөрэйэн тахсан, кэтэх ынахтаах ыал чопчу быһаарыныы ылынарыгар мэһэйдэр үөскээбиттэрэ мэлдьэх буолбатах. Ол курдук, 35 тыһ. солк. төбөҕө кэтэх ыаллар субсидия ылан баран, уут туттарбакка өрөспүүбүлүкэ соҕотуопкатын ситимэ эстэр турукка киириэн сөп диэн боппуруостар эмиэ турбуттара. Бу мэхэньииһими үөрэтиигэ, илдьиритиигэ Ил Түмэн дьокутаата Мария Христофорова тыа хаһаайыстыбатын министиэристибэтин эппиэттээх үлэһиттэрин, нэһилиэк баһылыктарын, тыа хаһаайыстыбатын тэрилтэтин салайааччыларын кытта ВКС көмөтүнэн хас да төгүллээн мунньах ыытан, кэтэх ыаллар ыанар ынахтарыгар 35 тыһ. солк. субсидия ылалларыгар, сир, нолуок, отчуоттааһын боппуруостара уһуллан, оннун булбуттара.
Ороһу нэһилиэгин баһылыга, СӨ норуотун хаһаайыстыбатын үтүөлээх үлэһитэ Анатолий Антонов Ил Дархан Айсен Николаев кэтэх ыалы өйүүр саҥа сонун мэхэньииһимин өйөөн, 2020 сыллаахха нэһилиэк бүддьүөтүн суотугар үүтү тутар-астыыр саҥа собуоту туппута. Быйыл ону ситэрэн, үүтү астыыр оборудованиелары булан-таҥан, аҕыйах хонуктаахха үлэҕэ киллэрдэ. Бу собуот силигин ситтэҕинэ, кэтэх ыал санитарнай туругун анааалыһын бардаҕына, бэрт сотору кэминэн үлэлээн барыахтаах.
Өрөспүүбүлүкэ Ил Дархана Айсен Николаев Ил Түмэн дьокутааттарыгар Анал этиитигэр Ороһу нэһилиэгэр кэтэх ыал туттарар үүтүгэр 30 солк. тутар саҥа мэхэньииһим олохтонон эрэрин туһунан дьон-сэргэ истиитигэр анаан эппитэ. Улууска биллэр урбаанньыт Светлана Сортолова ыал туттарар үүтүн киилэтин 30 солк. тутан астаан-атыылаан, дьону кытта төлөһөргө, баһылыктыын Анатолий Антоновтыын тыл тылга киирсэн, үлэлиир былааннаахтар. Баһылык Анатолий Антонов: «Дьаһалтам исписэлиистэрэ өйүүр-өйдүүр буоланнар, элбэх ороскуоту да көрүстэрбит туруоруммут былааммытын олоххо киллэрэр кыахха киирдибит», - диэн санаатын үллэстэр. Маны этэн эрдэхтэрэ, «Тыл үлэттэн арахсыбат», - диэн. Ороһу ылыммыт соруга табылларын туһугар, Харбалаах, Тамалакаан, Балаҕаннаах, Нам нэһилиэктэрин кэтэх ыаллара үүт туттараннар эбии дохуот оҥостоллоро былааннанар. Ороһу нэһилиэгин кэтэх ыалы өйүүр мэхэньииһимэ олоххо киирэн үлэлээн, ситиһиилээх буоларыгар эрэнэбит. Өссө чуолкайдаан быһаарар буоллахха, урбаанньыт Светлана Сортолова тыа хаһаайыстыбатын министиэристибэтиттэн соҕотуопкалааччы функциятын ылбат («возмещение части затрат сырого молока» субвенция харчытын). Манан сибээстээн, тыа хаһаайыстыбатын министиэристибэтиттэн субвенция быһыытынан көмө ылар соҕотуопка тэрилтэлэрэ 2022 сылга тутар закупочнай сыаналарын 1 киилэтигэр 30 солк. таһаарыахтара диэн эрэниэҕи баҕарыллар.
Степан Дмитриев, Үөһээ Бүлүү улууһун Балаҕаннаах нэһилиэгин баһылыга, СӨ норуотун хаһаайыстыбатын үтүөлээх үлэһитэ.
-
0
-
0
-
0
-
0
-
0
-
0
