Тэрээһиҥҥэ «АЛРОСА» хампаанньа Саха сирин уһулуччулаах дьонун ааттарынан ааттаммыт 43 алмаас сэртипикээтин туттарда. Ол туһунан Айсен Николаев суруналыыстарга кэпсээтэ. РЕКЛАМА «Биһиги үбүлүөйүнэн сибээстээн «АЛРОСА» хампаанньаны кытары бииргэ үлэлээн, 100 бөдөҥ алмааска үтүөлээх Социалистическай Үлэ, Сэбиэскэй Сойуус дьоруойдарын, онтон да атын Саха сирэ атаҕар турарын, сайдарын туһугар үлэлээбит-хамнаабыт сүдү дьоммут ааттарын иҥэрдибит. Онуоха АЛРОСА хампаанньа биһиги дьоруойдарбыт албан ааттарын үйэтитэргэ бэйэтин кылаатын киллэрбитэ үбүлүөйдээх сылы өссө суолталаата», – диэн Ил Дархан бэлиэтээтэ.
АЛРОСА хампаанньа үгүс сылларга Саха Өрөспүүбүлүкэтин бүддьүөтүгэр сүрүн үбү киллэрээччи тэрилтэнэн буолар. Геополитическай уонна экэнэмиичэскэй ыарахаттары аахсыбакка, өрөспүүбүлүкэ эрэгийиэннээҕи валовай бородууксуйатын үс гыммыттан биирин, Саха сирин бүддьүөтүн бэйэтин дохуотун аҥаарыттан ордугун алмаастаах хампаанньа киллэрэрин бэлиэтээтилэр. Ити улахан суолталаах сыыппара, тоҕо диэтэххэ өрөспүүбүлүкэ валовай эрэгэйиэннээҕи бородууксуйатыгар 10 % киллэрэрин, хампаанньа нолуоктан киирэр сүрүн чааһа өрөспүүбүлүкэҕэ хааларын Ил Дархан тоһоҕолоон эттэ.
Ааһан эрэр сыл чэпчэкитэ суох буолла, ол эрээри ааспыт сылга билгэлээбиппитинээҕэр үчүгэй түмүгү ситистибит диэн «АЛРОСА» хампаанньа генеральнай дириэктэрэ-бырабылыанньа бэрэссэдээтэлэ Сергей Иванов кэпсээтэ. «Хампаанньа алмааһы хостооһуҥҥа былаанын аһара толордо, ыраас барыспыт улаатта. Ол гынан баран кэккэ ыарахаттар бааллар, билигин биһиги хайа бэлэмниир үлэлэрин ыытабыт, тиэхиникэлэрбитин дойду уонна доҕордуу дойдулар оҥорбут тиэхиникэлэригэр уларытыынан дьарыктанабыт.
Хампаанньа Үүнэр көлүөнэ тус сыаллаах пуондатын кытары, култуура, үөрэх, наука, доруобуйа харыстабылын сайыннарыы эйгэтигэр социальнай эбэһээтэлистибэтин ситэрдэ. Аны өрөспүүбүлүкэ да, федеральнай да бүддьүөккэ нолуоктан киирэр үбүн былаанын аһара толордо», – диэн кини эттэ.
-
0
-
0
-
0
-
0
-
0
-
0
