16 ВОПРОСАВ ӨМНЭКЭЕ ЯРУТТА
Эври ечэн 10 инэҥидун Санкт- Петербургала Итуму Очин Чакабаклан эгден укчэнмэчэк одни.
Тачин-да административнай хоичим ярутти 18 – с итундула адыв-да айҥурам иврэ. Хан бэил дювур лоджияван нян балкоман стеклоч одаҥутан нугчири итум аччалтар. Санкт- Петербург городан социальнай итундулан тек иврэ эррөчим итум: эдук часки бэил, илэ-вут хөрми, субсидиялкан тамам өмнэкэнь - тит ганнатан.
Эрэк чакабакла депутатал ярутта нян дёкра горат губернаторан эчин гөнчэвэн: итундула ивми дес биннэн, эдук дюлэски, бостадюр бутэнри инвалид куҥал, социальнай таксич бивэчиннэвутэн.
ТЫВУН ИТУННИ
Карелия Республикан Итум очимҥални тывун дюгулин итун надаван гөн. Эрэк дюгулин хоя укчэнэк эрэгэр бивэттэн. Хисэчин нян долба хо урунь бивэттэн городла – да , илэ-дэ. Хоя этажалкан дюл далилитан, улицалдули кафел, барал музыкатан, харулча бэил икэтэн, хэдентэн, кунинтан эрэли хоиччоттан бэил хуклэмутэн дэгэлукэвэттэн. Якутскайла-да тачин-тит. Тек карантин оддакан, тивнэйрэкэн, улицалдули ирканикан – куниникан, хисэртэну - долбантану хэтэккөчидилдир.
Теми – дэ Карелия депутатални эгден штрафу тулдэвур укчэнмэттэ. Вице-спикер Ольга Шмаеник тачин-да кучукэн штраф ач надалкан бисивэн гөнни. Теми өмэн бэйду – 2 -5 тыкича, бэгэсэлду – 5-10 тыкичав нян ведомствалду – 10-20 тыкича биннэвэн гөн. Елтэнчэ анҥанду 6, 5 тыкича поротокол опча бисин. Эрэв итум эври ечэн 18 инэҥидун тулэннэвур гөн.
1,5 % -кан ИПОТЕКА
Коми Республикалан тек дагамадды эври билэн бягдукун часки 1,5 % -талкан ипотекав ивэннэтэн гөникэн сенатор Елена Шумиловатки мэтурин Коми Государственнай Советан Председателэн Сергей Усачев.
Елтэнчэ анҥаниду Коми республикалан 59 нимэк 3 проценталкан ипотекав гадыдюр дюгавур одытан, городалдук тэгэлэ бидэвур. Нян 2024 анҥаниду 804 мил. рублэв бэилду государство мултуннан.
КОМИ Республикаван өйинук көетчир.
Коми Республикалан биси Тимано – Печорскай гэрбэ территорияв геологическай картала ивуннэтэн. Тек төрлэ як-ут-та хөнтэвмэчин одакан, тарав нянингидадук өйинук ичиннэтэн. Тачин-да или-тали бодив бодиракатан, исагу ач лицензиялач аччалтаракатан өгинук этуннэтэн. Эрэв анҥанив карчив эчэл мултур, тар биникэн министэр Александр Комлев эдук часки карчив бөннэвутэн гөнни.
НЕНЕЦКЭЙ ОКРУК АВГИДАЛА БИСНИ?
Хан бэил эрэв округу Ямало- Ненецкэй окрукнюн хотаватта. Эсни тачин бис. Ненецкэй окрук Архангельскай областила бисни нян тар биникэн Россия субъекчин гэрбуттэн. Эрэк субъекта Россияла биси хөнтэ субъекталдук кучукэдмэрэтэн. Административнай центран – Нарьян- Мар. Элэ 25151 бэй тэгэттэн.
НЕНЕЦ төрэнни дюгулин.
2013 эври ечэн бягдун “Ненец төрэнни Ненецкэй окрукла” гэрбутти итум ивритэн. Эрэк итун дысучиннэн адыкун таҥулкан ҥөнмирэл төрэмутэн. Эйдукун депутатал төрэн дюгулин хояв укчэнрэ, нян эдук дюлэски мэн төрэмур энтэкэе дысучиннэвур, аилтаннавур гөн. Депутат Наталья Кардакова төрэм аилтанду хупкучэкэлдулэ аич хупкучиннэвутэн гөнни. Тар биникэн торэм хари хупкучимҥэ аччан эйдукукмэн хойран. Теми депутатал кадр дюгулин нян укчэнмэчидилрэ.
Парламендула адукун таҥулкан ҥөнмирэл дюгудутан гургэвчири комитет председателэн Матвей Чупров төрэм аилтанду, хупкучинду гранталбу оми ай биннэвэн гөнни. Ноҥан орам-да хоялтанду гургэв оми ай биннэвэн гөнни.
Эливунь гөми, ненец автономнай округан депутатални гору хуклэддидюр элэкэс мялдаҥатан хо мямси. Эйдукун осиду омҥавчав - бэрипчэв идук бакчинри? Он ненец төрэмэн аилтами дес бидин, як – та эсни хар, өгэрэбдин-гу төрэн, этэн-гу, тэндун бэриптэн-гу? Мэн ҥөнмирий төрэмэн ҥи-дэ бими эрэгэр одяракан, хэлбэттэкэн дес биннэн. НЁКАДЫ төрэм -дэ дюлэски як алаттиван ҥи хадин...
Нёкадидук тулматтан Варвара Белолюбская Илья Оконешников дукчадукун.
Перевод статьи Ильи Оконешникова на эвенский: Белолюбская Варвара Григорьевна, доцент кафедры северной филологии Института языков и культуры народов Северо-Востока РФ СВФУ им. М.К. Аммосова, кандидат филологических наук.
-
0
-
0
-
0
-
0
-
0
-
0
