«Үрдэл» бириэмийэҕэ номинаннарынан «Тэтим» араадьыйаҕа ордук элбэхтик иһиллэр ырыа толорооччулара сүүмэрдэнэллэр. Өссө ааспыт сыл алтынньытыгар Виктор Иванов – Сиэйэ Уола «Отуу Уота» диэн ырыатынан саамай элбэх куолаһы ылан, куонкурус финалыгар ааспыта.
Музыкальнай бириэмийэ балаһыанньатын быһыытынан, кыттааччылары дьүүллүүр сүбэ уонна көрөөччүлэр сыаналыыллар. Ырыаһыттар бөлөҕүнэн нэдиэлэ аайы ыллаабыттара.
Ол тухары Сиэйэ Уола инники күөҥҥэ сылдьыбыта уонна тохсунньу 7 күнүгэр «Үрдэл» музыкальнай бириэмийэ сүрүн бирииһин - 100 тыһыынча солкуобайдаах сэртипикээти -- дохсун ытыс тыаһыгар уйдаран ылла.
Сэртипикээтин тутаары туран, Виктор Иванов олус долгуйарын билиннэ. Саха чаҕылхай сулуһа саха норуотугар, биир дойдулаахтарыгар, Бүлүү бөлөх улуустарын олохтоохторугар, ийэтигэр, аҕатыгар, ойоҕугар, итиэннэ кинини өйөөччүлэргэ, айар үлэтин сүгүрүйээччилэригэр махтанна.
Виктор Иванов олох очурдарын этэҥҥэ ааһан, улахан сыанаҕа төннөн, бар дьонун үөрдүбүтэ. Сиэйэ Уола булгуруйбат күүстээх санаатынан уонна талаанынан бүгүн ат уорҕатыгар сылдьар! Онон Виктор Ивановка инники айар үлэтигэр өссө да үрдүк ситиһиилэри баҕарабыт, өссө даҕаны ылбаҕай ырыаҕынан саха дьонун үөрдэ, кулгаахпытын манньыта тур.
-
0
-
0
-
0
-
0
-
0
-
0
