Өрөспүүбүлүкэ саамай чыпчаал “Үрдэл” бириэмийэҕэ номинаннарынан “Тэтим” араадьыйаҕа ордук элбэхтик иһиллэр ырыа толорооччулара сүүмэрдэнэллэр диэн "Саҥа Олох суруйар".
Манна даҕатан эттэххэ өссө 2023 сыл алтынньытыгар, биир дойдулаахпыт Сардаана Корякина-САРДААНА тылларыгар, Инна Донская-Дайаана матыыбыгар, эстрада чаҕылхай сулуһа Сахая толоруутугар “Оҕобор” диэн ырыатынан саамай элбэх куолаһы ылан, куонкурус кыайыылааҕынан ааттаммыта.
Музыкальнай бириэмийэ балаһыанньатын быһыытынан, кыттааччылары дьүүллүүр сүбэ уонна көрөөччүлэр сыаналыыллар. Ырыаһыттар бөлөҕүнэн нэдиэлэ аайы ыллаабыттара.
Ол тухары ырыаһыт Айаал Кириллин-Күндэл “Байанай” ырыатынан инники күөҥҥэ сылдьыбыта уонна тохсунньу 4 күнүгэр “Үрдэл” музыкальнай бириэмийэ “Бастыҥ ырыа” номинация хаһаайына буолан сүрүн бириистэртэн биирдэстэрин — 50 тыһыынча солкуобайдаах сэртипикээти ылла.
Маннык үөрүүлээх дьаһалга, САРДААНА сырыы аайы олус долгуйарын билиннэ. Саха литэрэтиирэтин кэскиллээх суруйааччыта, Инна Донская-Дайаанаҕа, ырыаһыт Айаал Кириллиҥҥэ, аранжировщик Алексей Батюшкиҥҥа, “Дуораан рекордс” устуудьуйа кэлэктиибигэр биир дойдулаахтарыгар Чурапчыларга, Илин эҥэр бөлөх улуустарын олохтоохторугар, ийэтигэр, аҕатыгар, дьиэ кэргэнигэр, доҕотторугар, итиэннэ кинини өйөөччүлэргэ, айар куттаах атастарыгар дириҥник махтанна.
Санатан эттэххэ, Сардаана Корякина, Чурапчы нэһилиэгин “Куоҕалы” ТОС олохтоохторо, СӨ суруйааччыларын Сойууһун чилиэнэ Римма Корякина-ХОТУУНА уонна тиис бырааһа Александр Корякин төрөппүт улахан кыыстара, САРДААНА билигин өрөспүүбүлүкэҕэ биир биллэр, кэскиллээх суруйааччы, ааҕааччы киэҥ биһирэбилин ылбыт “Күтүөккэ хомолто” сэһэн ааптара, элбэх хоһооно ырыа буолан кынаттанан таҕыстылар, ону таһынан билигин бэйэтэ СӨ пенсионнай управлениетыгар буҕаалтырынан таһаарыылаахтык үлэлии-хамсыы сылдьар, элбэх оҕолоох дьиэ кэргэн амарах ийэтэ.
Күндүл толоруутугар “Байанай” ырыа
Эрэллээх аппынан көтүтэн,
Санаабар кынаттаах курдукпун,
Аар тайҕа иннибэр арыллан,
Аргыардаах аартыкка турабын.
Хос ырыата:
Үөр-көт, күлүм аллай,
Аал уоппун аһатан
Айах тутан эрдэҕим,
Алакы! Алакы!
Баай байанай мичик гын
Бэттэх көрөн маанылаа!
Саа саадах санныбар иилинэн
Аал уотум иннигэр нөрүйдүм,
Нохтоолоох сүрэҕим түгэҕэр
Эр санаам хаҥыла иитиллэр.
САРДААНА тыллара, Инна Донская матыыба.
Сэмэн ЖЕНДРИНСКЭЙ
-
1
-
0
-
0
-
0
-
0
-
0
