Издательский дом Редакция Подписка
Погода в Якутске: . 21 oC

Боксаҕа быйылгы Арассыыйа чөмпүйэнээтэ балаҕан ыйын 29 – алтынньы 10 күннэригэр Чита куоракка ыытылынна.

Боксаҕа быйылгы Арассыыйа чөмпүйэнээтэ балаҕан ыйын 29 – алтынньы 10 күннэригэр Чита куоракка ыытылынна.

Дойду улахан хатыһыылаах рингэтигэр барыта 337 тирии бэрчээкки маастардара уйаннарын-хатаннарын билистилэр.

13 боксербыт кытынна

Улахан күрэхтэһии уотун-күөһүн, күүрээнин туһунан Саха Өрөспүүбүлүкэтин боксаҕа кылаабынай тириэньэрэ Владимир Иванович Павлов кэпсиир:

1

- Бэйэбит хамаандабыт туругун туһунан кэпсээнтэн саҕалыыр буоллахха, дойду биир тутаах күрэхтэһиитигэр 13 боксербыт кытынна.

48 киилэ ыйааһыҥҥа – Михаил Прокопьев, Рустам Туприн, Егоров Талбан. 51 киилэҕэ – Василий Егоров,Николай Григорьев.

 54 киилэҕэ боксера суох этибит.

57 киилэҕэ – Михаил Варламов, Ян Алексеев.

 60 киилэҕэ – Виталий Стручков, Валентин Иванов.

 63,5 киилэҕэ – Айтал Дьяконов.

 71 киилэҕэ – Никита Малгин.

67 уонна 75 киилэ ыйааһыннарга боксердара суох этибит.

80 киилэҕэ – Назар Андреев.

 86 киилэ ыйааһыҥҥа эмиэ киһитэ суох этибит.

92 киилэҕэ Илья Попов киирсибитэ.

 Саамай ыарахан ыйааһыҥҥа, 92 киилэттэн үөһээ, боксера суохпут.

3

Эльбрус хайа тэллэҕэр

--Атырдьах ыйын 15 чыыһылатыттан балаҕан ыйын 5-гэр диэри 21 хонуктаах хомуур эрчиллии Хотугу-Кавказтааҕы бэдэрээлинэй уокурук Кабардино-Балкария өрөспүүбүлүкэтин бэртээхэй бэйэлээх спортивнай баазатыгар тэриллибитэ.

Биһиги өрөспүүбүлүкэбититтэн бу эрчиллиигэ Василий Егоров, Михаил Прокопьев, Талбан Егоров, Николай Григорьев, Айтал Дьяконов, Ян Алексеев, Назар Андреев сырыттылар. Бу уолаттар бэйэлэрин ыйааһыннарыгар өрөспүүбүлүкэҕэ бастакы нүөмэрдэринэн сылдьаллар. Аатырар-сураҕырар Эльбрус хайа тэллэҕэр эрчиллэр баазалар үлэлииллэр. Хайалаах буолан, эрчиллэргэ, чахчы, уратылаах дойду. Манна спортсмен туйгун уопсай физическэй бэлэми булгуччу ылар эбит. Хамаандабыт атын боксердара (6 киһи) «Манньыаттаах» спортивнай баазаҕа эмиэ хомуур эрчиллиини ааспыттара. Кинилэргэ бэйэбит атын боксердарбыт спарринг- партнер буолбуттара.

Спортсмен бэйэтин дьылҕатыгар бэйэтэ хаһаайын

--Спорт үтүөлээх маастара, Дьобуруопа икки төгүллээх чөмпүйүөнэ, аан дойду чөмпүйэнээтин финалиһа, Арассыыйа түөрт төгүллээх (бу чөмпүйэнээт кэнниттэн биэс төгүллээх) чөмпүйүөнэ, Улуу тустуук Р.М. Дмитриев аатынан Олимпийскай эрэсиэрбэлэри бэлэмниир учуулусса выпукнига Василий Егоров рингэҕэ быһаччы түөртэ таҕыста, биирдэ утарылаһааччыта эчэйбитинэн, быһа кыайыыны сурунна.

5

Василий бастакы тахсыытыгар Хотугу Кавказтааҕы бэдэрээлинэй уокурук боксера Александр Быкасовтыын кииристэ. Вася үс раунд тигинэччи үлэлээн, олох баһыйа тутан кыайда. Иккис утарылаһааччыта – Ахтем Закиров, улахан уопуттаах боксер. Ол курдук, кини Арассыыйа ааспыт сыллааҕы чөмпүйүөнэ, Аан дойду чөмпүйэнээтин боруонса призера. Былырыын Арассыыйа финалыгар Василийы кыайан турар. Василий үс раунд наар кимэн киириилээх охсуһууну ыытан, ханнык да саарбахтааһына суох кыайыыны ситистэ.

Утары муннукка туруохтаах үһүс киһитэ илиитин эчэппитинэн, быһа кыайыыны суруннубут. Баир Батлаев ааспыт сыллааҕы Арассыыйа чөмпүйэнээтин боруонса призера, Ньиэптээх дойдулар аан дойдутааҕы кубоктарын хаһаайына, ким да үрдүнэн халты көрөн кэбиспэт киһитэ. Бүрээт боксера бары уоҕун-кылынын ууран туран киирсэн кииристэ эрээри, Василий таһыма ойуччу үрдүгэ, ханнык да мөккүөрү таһаарбата. Чөмпүйэнээт биэтэгэр сүрүн утарылаһааччыта дагестанец Расул Салиевтыын утарыта тахсаллар.

2019 сылга Самараҕа ыытыллыбыт Арассыыйа чөмпүйэнээтигэр Василий Салиевка кыайтаран турар. Салиев сааһынан эдэр, онон сорох тириэньэрдэр «уол Егоровы кырытыннарар буолла» диэн түүйбүттэрэ. Спорка итинник түгэннэр үгүстүк үөскээччилэр. Ардыгар ол олоххо киирээччи, үксүгэр биир-икки түбэлтэ быһыытынан сүтэн-иҥэн, умнуллан хаалааччы. Олох араастаан оонньуур, оттон спортсмен бэйэтин дьылҕатыгар бэйэтэ хаһаайын. Ол аата, барыта бэйэтиттэн тутулуктаах.

4

Итини барытын үчүгэйдик өйдүүр икки боксер, раунд хайа саҕаланыаҕыттан кэтэнэ, эрэспиэскэлии барбакка, иэмэх инчэҕэй талахтыы эриспитинэн бараллар.

Бастакы раунд түмүктэнэр, биһиги көрөрбүтүгэр, эрбии биитин кэриэтэ тэбис тэҥ этилэр. Ол эрээри, судьуйалар быһаарыыларынан, бастакы раунд Салиев туһатыгар түмүктэнэр. Бэрт кылгас тохтобулга Василий киирсэр таактыкатын уларытарга соруммута тутатына биллэн барар. Хаҥас илиитинэн уһун көнө охсуулары оҥортуур, ол иһигэр утарсааччытын хук охсууларыттан аһаран биэрэн, илиилэрин аннынан тахса-тахса, уҥатынан ойоҕос кылгас охсууларынан сыалын табыталыыр. Маннык ньыманан баһыйар ахсааннаах очукуону хомуйар. Үһүс рауҥҥа Салиев олох ыһыллан хаалла уонна ол туругуттан өрүттүбэтэ. Василий тиһэх киирсиитигэр, кутталлаах утарылаһааччытын түргэн толкуйунан, балаһыанньаттан көрөн, охсуһуу хаамыытын хайа баҕарар уларыта охсорунан чахчы баһыйа тутта. Бу дьоҕурун салгыы сайыннаран, дьиҥнээх автоматизмҥа тиэртэҕинэ, салгыы өссө киэҥ аартыктар тэлэллэн биэриэхтэрин сөп этэ.

Охсуутунан баһыйтарар этэ эрээри...

-- Эдэр кэскиллээх боксер Михаил Прокопьев, хас да сыллааҕыта Краснодарга олохсуйан, онно эрчиллэ сырыттаҕына, киэҥ биллиилээх тириэньэр Артур Иннокентьевич Пахомов көрөн, олохтоохтук кэпсэтэн, дойдутугар аҕалбыта.

Михаил бастаан норуоттар икки ардыларынааҕы кылаастаах маастар, Арассыыйа сүүмэрдэммит хамаандатын чилиэнэ Игорь Царегородскайдыын көрсөр. Биһиги уолбут наар кимэн киириилээх истиили тутуһар. Үчүгэй, күүстээх охсуулардаах буолан, ол истиилэ киниэхэ сөп түбэһэр. Үһүс раунд түмүгүнэн 5 судьуйаттан 4-рэ биһиги уолбутугар кыайыыны биэрэллэр. Михаил иккис киирсиитигэр биир дойдулааҕа Рустам Туприны баһыйа тутар. Финал аҥаарыгар чөмпүйүөннээбит Эдмунд Худояҥҥа очукуонан баһыйтарда. Худоян наар куота көтөн биэрэ сылдьан, очукуо хомуйар боксер.

Худоян, били, үкчү Москубатааҕы Олимпиадаҕа сэбиэскэй боксердартан соҕотоҕун чөмпүйүөннээбит Шамиль Сабировы санатар. Биһиги аатырбыт боксербут Сэбиэскэй Сойуус икки төгүллээх призера Виктор Ефремовтан охсуутунан олох баһыйтарар этэ эрээри, очкуо хомуйарынан куруутун кыайыылаах тахсааччы. Арай ону өссө улахан ааттаах-суоллаах боксербут Анатолий Филиппов Сэбилэниилээх күүстэр күүстээх боксердарын турнирдарыгар Сабировы нокаут ыытан «иэстэһэн» турардаах. Онон, тиһэххэ, «саха ыарахан сутуруга» диэн туоҕун-хайдаҕын син биир биллэрэн турардаахпыт. Маны төһө да оонньуу-күлүү курдук этилиннэр, барыта баар суол буолар.

6

Ситиһиилээх кыттыы диэн сыаналаатылар

--Атын уолаттарбыт тустарынан кылгастык эттэххэ, 71 киилэ ыйааһыннаахтарга Никита Малгин биир охсуһууну ыытта эрээри, куһаҕана суох өйдөбүлү хаалларда. 92 киилэҕэ Илья Попов утарсааччытын кытта, тэппит атаҕын кубулуппакка туран киирсэн баһыйтарда. Ол утарсааччыта кэлин боруонсаҕа тигистэ. Николай Григорьев финал чиэппэригэр тэҥ киирсиигэ кыайтарыылааҕынан ааҕылынна. Михаил Варламов эмиэ үкчү итинник балаһыанньаланна. Талбан Егоров, Виталий Стручков эмиэ финал чиэппэриттэн туораатылар. Баҕар, сорохтор манны мыына саныахтара. Ол эрээри бу сэмэй түмүк, спортсмеҥҥа бастакы уопут, улахан рингэҕэ бэйэ күүһүн холонуу, салгыы сыалы-соругу туруорунуу буоларын умнумуоҕуҥ.

Тус бэйэм Василий Егоровтан, Васяттан, улаханнык үөрэбин. Урукку өттүгэр киниэхэ хотторуу хомолтотун биллэрбит икки утарылаһааччытын олох астыктык кыайталаабытыттан. Спорка итинник буолар: ардыгар кыайтарыы кэлин тиһэххэ улууканнаах кыайыыларга тиэрдэрэ. Улахан спортсменнар айылҕаларынан, күүстэринэн-уохтарынан, эрчиллиилэринэн, бэлэмнэринэн бары биир тэҥ буолаллар. Өй, дьулуур, хараактар эбилиннэхтэринэ – барытыгар быһаарар оруолланаллар.

2

Тустаах салалталарбыт ситиһиилээх кыттыы диэн сыаналаатылар.  Ол биһигини үөрдэр. Ол эрээри инникитин саҥаттан саҥа соруктар уонна үрдэллэр туруохтаахтарын бэйэбит өттүбүтүттэн эмиэ үчүгэйдик өйдүүбүт.

Хаартыскалар Интэриниэт ситимиттэн

                                                                                                              

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Ньурбалар - Аммаҕа

Бүгүн, бэс ыйын 21 күнүгэр, Аммаҕа Олоҥхо ыһыаҕын иккис күнэ күөрэйэн таҕыста. 
21.06.24 10:49
Закон и жизнь

Повысят военные пенсии

С 1 октября 2024 года пенсии военным пенсионерам повысят на 5,1 процента. Соответствующий…
21.06.24 09:44