Биһиги аартыка суолларын оҥорооччуларыттан биирдэстэрин –Николай Атласов туһунан билиһиннэриэхпитин баҕарабыт.
«Аартыка суоллара» тэрилтэ Муома улууһунааҕы учаастагын машиниһын кытары быйыл томороон тымныы үгэннээн турдаҕына, олунньу ыйыгар билсибитим. Кини Муома уонна Абый улууһун холбуур «Индигир» суолун учаастагын тибии чигдилээбит хаарыттан ыраастыы сылдьара, ити кэмҥэ халыма-индигиир улуустарыгар буоларын курдук тыаллаах күннэр тураллара. Николай Христофорович бу кэмҥэ суолу оҥоро тахсыбатаҕа буоллар, биһиги массыынабыт хаарга баттыллан туруо эбит.
Николай Атласов тыраахтарынан Хонуу бөһүөлэгиттэн Абый улууһун Кэбэргэнэ нэһилиэгин хайысхатынан биһигиттэн быдан эрдэ, хас да күн инниттэн айаннаабыт этэ. Кини үһүс күнүн К-703 тыраахтарынан «Индигир» суолун учаастагын ыраастыы сылдьара. Эбиэтин кэмигэр мин кинини кытта кэпсэппитим.
«Мин кырабыттан суоппар буолуохпун баҕарарым. Аҕам суолу оҥорор техника суоппарынан үлэлиирэ, мин кинини батыһа кытта сылдьан бу үлэ ымпыгын-чымпыгын көрө-билэ улааппытым. Биһиги үлэбит ыарахан, ол кырдьык. Кыстык кэмигэр үксүн суолга хонобут-өрүүбүт. Вахтовик массыына арыаллаабатаҕына, тыраахтырбытыгар аһыыбыт, утуйабыт. Билигин Абый улууһугар тиэрдэр «Индигир» суолу ыраастыы-ыраастыы айаннаан иһэбин, өссө хас да күн суолга сылдьарым буолуо. Туһалаах үлэни оҥоро сылдьабын диэн санаа миигин бу тыйыс тымныыларга сылытар», – диэн кини сэмэйдик үлэтин туһунан кэпсээтэ.
Кырдьык, аартыка түөлбэтин суолларын оҥорор үлэһиттэр олус туһалаах, наадалаах үлэни оҥоро сылдьар буоллахтара!
Николай Атласов туһунан кини кэллиэгэлэрэ олус истиҥник этэллэр.
«Николай Христофорович идэтигэр биир бастыҥ киһи, суоппардыырын таһынан бэртээхэй силиэсэр. Кини тиэхиникэ өрөмүөнүн ымпыгар-чымпыгар диэри билэр. Ону таһынан, Николай үтүө доҕор, көмөлөһөргө мэлдьи бэлэм киһи. Оннооҕор хас эмэ күнү быһа суолга сылдьыбыт да буоллаҕына, көрдөстөххө, көмөҕө кэлбитэ эрэ баар буолар», – диэн доҕотторо кэпсииллэр.
Оттон «Аартыка суоллара» тэрилтэ Муоматааҕы учаастагын начаалынньыга Константин Терешкин үлэһитин туһунан астынан олорон кэпсиир.
«Николай Христофорович Муома оройуонун суолун хаһаайыстыбатыгар 2003 сылтан «Индигир суоллара» тэрилтэ саҕаттан үлэлиир. Уопуттаах, эппиэтинэстээх үлэһит. Кини тыраахтар суоппара эрэ буолбатах, трэкел, грейдер курдук суолу оҥорор анал техникаларга үлэлиир А3 категориялаах суоппар. Ол иһин кыһыҥҥы суолу арыйа кини атын үлэһиттэри кытта суолу тэлэ бастакынан айанныыр. «Индигир» суолга Муома улууһунан сытар учаастак уустугунан биллэр. Кыһын устата хаста да тарыҥныыр, хаарынан тибэр. Ол иһин биһиги үлэһиттэрбит суолга нэдиэлэни-нэдиэлэнэн дьуһуурустубалыыллар. Николай хаһан да маннык үлэттэн куотумматаҕа», – диэн Константин Терешкин этэр.
Үөһээ бэлиэтээн ааспытым курдук, Атласовтар удьуор суол хаһаайыстыбатын үлэһиттэрэ. Николай Христофорович аҕата «Индигир суоллара» тэрилтэҕэ өр сылларга үлэлээбит. Оттон улахан уола Богдан идэтинэн техниканы өрөмүөннүүр силиэсэр, оройуон тутаах тэрилтэтигэр үлэлии сылдьар. Орто уола Ян аармыйаҕа сулууспалаан кэлэн баран, «Артыка суоллара» тэрилтэ Муоматааҕы учаастагар үлэҕэ киирбит, быйыл машинист идэтин баһылаабыт.
«Кыра сылдьан аҕабын сайыһан үлэтигэр барсарым. Оннооҕор кыһыҥҥы суолу тэлэ тахсалларыгар барсарым. Оччолортон да бу олус ыарахан үлэ буоларын көрөн улааппытым. Мин техниканы кытта бодьуустаһарбын сөбүүлүүбүн, улахан автотехника уруулугар олорорбуттан астынабын, үлэм туһалааҕын билэбин. Ол иһин эһэм уонна аҕам курдук суол оҥорооччу буоларга быһаарыммытым», – диэн Ян Атласов кэпсиир.
Бу курдук бэйэтин идэтигэр бэриниилээх Николай Атласов үлэлиирин көрөн баран, киһи дьоло судургу - дьиҥ кырдьыкка кистэнэр эбит диэн өйдүүгүн. Үлэҕин сөбүлүүр, дьоҥҥо-сэргэҕэ туһаны аҕалартан астынар буоллаххына, сырдык күн анныгар миэстэҕин булан олороргун туоһулуур эбит.
Сардаана Кузьмина.
-
0
-
0
-
0
-
0
-
0
-
0
