Чэпчэтиилээх ипотека бырагыраамата 2020 с. муус устарыттан үлэлиир. Чэпчэтии саҥа дьиэлэргэ кыбартыыраны атыылаһарга, чааһынай дьиэни туттарга эбэтэр дьиэ туттар сири ыларга анаан бэриллэр. Эрдэ Москубаҕа уонна Москуба уобалаһыгар, Санкт-Петербурга уонна Ленинград уобалаһыгар кредит муҥутуур кээмэйэ 12 мөл. солкуобайга тэҥнэһэрэ. Оттон атын эрэгийиэннэргэ икки төгүл кыра суума көрүллэрэ. Ааспыт сыл ахсынньытыттан Арассыыйа бары субъектарыгар муҥутуур кээмэйи 6 мөл. тэҥнээбиттэрэ. Бырагырааманы хаста да төхтөрүйэн уһаппыттара, онон бааннар икки триллионтан тахса суумалаах мөлүйүөн кэриҥэ чэпчэтиилээх кредити биэрбиттэр.
Бу сыл от ыйыгар түмүктэниэхтээх бырагырааманы уһатыы туһунан билигин дойду бырабыыталыстыбата уонна Киин баан дьүүллэһэллэр. «Сиһилии боппуруоһу иккис кыбаарталга көрүөхтэрэ», - диэн кулун тутар 12 күнүгэр «Парламентская газета» Арассыыйа тутууга уонна ОДьКХ миниистирин солбуйааччы Юрий Муцеков иһитиннэрбитэ.
Чэпчэтиилээх ыстаапка көмөтүнэн
2022 с. ахсынньытыгар Арассыыйа Бэрэсидьиэнэ В. Путин чэпчэтиилээх ипотека ыстаапкатын 8% үрдэтэн туран, 2024 с. от ыйын 1 күнүгэр диэри уһатарга этии киллэрбитэ. Бырагыраама былырыын тутааччылар муҥутуур үрдүк көрдөрүүгэ тахсалларыгар көмөлөспүтэ: дойдуга 110 мөлүйүөнтэн тахса квадратнай миэтэрэ иэннээх дьиэни киллэрбиттэрэ «сүрүннээн ипотекаттан уонна чэпчэтиилээх ипотекаттан сылтаан» диэн судаарыстыба баһылыга кулун тутар 5 күнүгэр Ставрополь кыраай Солнечнодольскайдааҕы тэпилиисэ ситимин үлэһиттэрин кытта көрсүһүүтүгэр эппитэ. Кини тыа хаһаайыстыбатыгар аналлаах 0,1-тэн 3 диэри бырыһыаннаах чэпчэтиилээх ипотеканы, көдьүүстээхтик үлэлии трарынан, оннунан хаалларарга быһаарбыттарын чопчулаата.
В. Путин олунньу 29 күнүнээҕи Федеральнай Мунньахха Туһаайыытыгар дьиэ кэргэн ипотекатын 2030 сылга диэри уһатарга сорудахтаабыта. Бу ипотеканан, чэпчэтиилээх ипотекалартан саамай кэрэхсэнэллэрэ буолан, сүүһүнэн тыһыынча дьиэ кэргэн туһаммыта.
Сиһилии бу сигэнэн киирэн ааҕыҥ: https://www.pnp.ru/economics/v-minstroe-obsuzhdayut-vozmozhnost-prodleniya-lgotnoy-ipoteki.html
Антонина НЕУСТРОЕВА
-
0
-
0
-
0
-
0
-
0
-
0
