Өбүгэлэрбит ыһыаҕы бэс ыйыгар күммүт саамай уһаан, түүн кылгаан турар кэмигэр сиэри-туому тутуһан, Үөһээҥҥи Үрдүкү Айыыларга сүгүрүйэллэрэ, томороон тымныылаах, хойуу туманнаах кыһыны этэҥҥэ туораан, чээлэй күөҕүнэн сууланан турар айылҕаҕа, сайылыкка тахсыбыттарыгар махтаналлара. Ол иһин Бастакы Бэрэсидьиэммит Михаил Николаев бэс ыйын 21 күнүн ыһыаҕынан сибээстээн, өрөбүл күнүнэн биллэрбитэ.
Дьокуускай куоракка урут ыһыах Тыа хаһаайыстыбатын академиятын ипподромугар ыытыллара, 1990-ус сылларга билиҥҥи курдук элбэх киһи маассабайдык сахалыы таҥнан ыһыахтыы кэлбэт этэ, үксэ улуустан төрүттээх, дойдуларыгар ыһыахтыы үөрэммит дьон мусталлара.
Онтон куорат дьаһалтата Ипподром сирэ кыараҕас диэн Эллэй эһэбит аан бастаан ыһыах ыспыт сирин Үс Хатыҥ уйгулаах киэҥ нэлэмэн хонуутун булан, 1998 с. ол саҕана саҥа баһылыгынан талыллыбыт Илья Михальчук бастакы ыһыаҕы арыйбыта. Ыһыах аһыллыытыгар эҕэрдэ тылы Сахабыт Сирин Бэрэсидьиэнэ Михаил Николаев эппитэ.
Ол кэмтэн ыла 1998 с. Туймаада ыһыаҕа Үс Хатыҥҥа ыытыллар буолбута. Ипподром кэнниттэн аан бастаан Үс Хатыҥҥа сылдьан баран ыһыах буолар сирэ эчи киэҥин, улаханын, киһи билэр киһитин даҕаны булан көрбөт, биир уһугуттан анараа уһугар хаамарга туохха эрэ аралдьыйан, дьоҥҥуттан хааллаххына, кыайан булбат курдуккун. Иннигэр-кэннигэр дьон аалыҥнас, кэлии-барыы тохтоло суох кутуллар.
Бастакы Дыгын оонньуутугар Николай Дьяконов хас да сыл субуруччу кыайбыта, онтон Иван Белолюбскай күнэ күөрэйэн тахсан, өр кэмҥэ иннин кимиэхэ да биэрбэккэ, кыайыы өрө көтүтэр өрөгөйүн билбитэ.
2012 с. Саха Сирэ Арассыыйа састаабыгар киирбитэ 380 сылыгар Алтан Сэргэ тула оһуохайга 15293 киһи кыттан, бастакы Гиннесс рекорда олохтоммута, ону Великобританияттан кэлэ сылдьар эспиэр судьуйа Джек Брокбэнк сурукка киллэрбитэ.
Сыл ахсын дьон-сэргэ ыһыахха сылдьара элбээн, араас омук сириттэн ыалдьыттар, халыҥ дэлэгээссийэлэр кэлэллэрэ. Үс Хатыҥҥа отучча былаһааккаҕа 70 тахса тэрээһин ыытыллар буолбута.
2014 с. кырылыы көөнньөр кымыс иһиитин сиэригэр-туомугар 11 136 киһи кыттан, Гиннесс иккис рекорда олохтоммута, ону тустаах судьуйа Правин Пател бэлиэтээбитэ.
2016 с. ыһыахха 180 000 тахса ыалдьыт сылдьыбыта, сүүсчэкэ араас тэрээһин ыытыллыбыта, блогердарга «INSTA-VINE FEST» бастакы аан дойдутааҕы бэстибээл буолбута. Туймаада ыһыаҕа “RussianEventAwards” туризм эйгэтигэр Арассыыйаҕа бастакы миэстэни ылан, национальнай бириэмийэнэн наҕараадаламмыта.
Быйыл Үрүҥ Тунах ыһыахпыт Үс Хатыҥҥа бэс ыйын 27-28 күннэригэр ыраахтан-чугастан кэлбит ыалдьыттары түмүөҕэ, быйылгы ыһыах Арассыыйаҕа норуоттар сомоҕолоһууларын, өрөспүүбүлүкэҕэ Култуура сылыгар ананыаҕа, икки күнү супту түһүлгэ аайы тохтоло суох сүүстэн тахса тэрээһин ыытыллыаҕа.
Ааптар хаартыскаҕа түһэриитэ.
-
0
-
0
-
0
-
0
-
0
-
0
