Онно биэс эдэр агроном, ол иһигэр Иван Бардеев («Наука» хааччахтаммыт эппиэтинэстээх тэрилтэттэн), Иван Лукин уонна Василий Сивцев (иккиэн «Биэттэ-Агро» хааччахтаммыт эппиэтинэстээх тэрилтэттэн), Евгений Фомин уонна Гаврил Прядезников («Арассыыйатааҕы тыа хаһаайыстыбатын киинэ» федеральнай бүддьүөт тэрилтэтиттэн) күөн көрүстүлэр.
Икки күн устата икки түһүмэҕинэн ыытыллыбыт күрэхтэһии аһыллыыта итиэннэ бастакы түһүмэҕэ Тыа хаһаайыстыбатын уонна ас-үөл бэлиитикэтин министиэристибэтин аактабай саалатыгар буолла. Миниистири солбуйааччы Прокопий Николаев куонкурус кыттыылаахтарын эҕэрдэлииригэр: " Биһиги тыйыс килиимэттээх дойдубутугар Сахабыт Сиригэр агроном үлэтэ ордук уустук, ыарахан уонна ол тэҥинэн бочуоттаах. Бүгүҥҥү күрэхтэһии исписэлиис быһыытынан бэйэ сатабылын, маастарыстыбатын көрдөрөр, уопут атастаһар уонна идэҕэ ыччаты тардар соруктаах тэриллэр", – диэтэ. Бу күн теорияҕа ананна, күрэхтэһээччилэр 80 ыйытыктаах тиэскэ хардардылар.
Иккис түһүмэх АГАТУ (ректор Ил Түмэн дьокутаата Валерий Федоров) Өктөмнөөҕү салаатын баазатыгар, бааһынаҕа ыытылынна. Күрэхтэһээччилэр алта муодулу (сорудаҕы) толордулар. Бастакы сорудах «Агроном суумкатын» туһаныыга туһуланна. Холобур, термометрдарынан бааһына буорун температурата, бурдук сиигэ мээрэйдэнэр, рН-метрынан буор аһыылыга, анемометрынан салгын температурата, тыал күүһэ быһаарыллар. Хонуутааҕы линейканан бааһынаҕа тэҥ өрүттээх түөрт муннугу оҥорон, сиэмэ тахсыыта, сыыс от үүнүүтэ ааҕыллар. Агрономнар бэһиэн бу прибордары үчүгэйдик баһылаабыттарын көрдөрдүлэр.
Иккис сорудах бурдук түүтэҕин холобуругар ыһыыны анаалыстааһыҥҥа, үһүс – үүнээйини харыстыыр дьаһаллары тэрийиигэ, төрдүс – үүнээйи хаачыстыбатын сыаналааһыҥҥа, бэһис – ыһыы сиэмэтин хаачыстыбата ыстандаарка төһө сөп түбэһэрин, туох ыарыылааҕын эбэтэр дьиэктээгин быһаарыыга, алтыс – ыһыыга тэйиччиттэн мониторы оҥорууга ананнылар.
Куонкуруска дьүүллүүр сүбэни таһынан, хас сорудах ахсын эспиэртэринэн уопуттаах агрономнар, агрохимиктэр, ол иһигэр, министиэристибэ, «Россельхозкиин» исписэлиистэрэ, ТХНЧИ, АГАТУ учуонайдара үлэлээтилэр. Инньэ гынан, икки күн устата тыҥааһыннаах күрэхтэһии буолла. Күн-дььыл даҕаны анаабыт курдук туран биэрдэ.
Туох барыта түмүктээх буолар. Хас сорудах уонна түһүмэх ахсын таһаарыллыбыт баалларынан, Василий Сивцев бастаата, иккис миэстэни Иван Бардеев, үһүс миэстэни Гаврил Прядезников ыллылар.
Жюри бэрэссэдээтэлэ, ТХНЧИ дириэктэрэ Михаил Черосов күрэстэһээччилэр таһымнарын үрдүктүк сыаналаата, эдэр агрономнар кытталлара үөрдэр, кинилэр саҥа сүүрээни киллэрэллэр, салаа кэскиллээҕин көрдөрөллөр диэтэ. Күрэхтэһии усулуобуйата федеральнай ирдэбилгэ сөп түбэһиннэрэн оҥоһуллубута биһиги исписэлиистэрбитигэр кытаанах тургутуу буоларын итиэннэ хайдах таһымҥа тардыстар ирдэнэрин бэлиэтээтэ.
Күрэхтэһии кыайыылааҕа Василий Сивцев былырыын аан бастаан ыытыллыбыт өрөспүүбүлүкэтээҕи куонкуруска бастаан, Мордовияҕа тэриллибит Бүтүн Арассыыйатааҕы куонкуруска Саха Өрөспүүбүлүкэтин аатын көмүскээбитэ. Быйылгы күрэхтэһии туһунан маннык эттэ:
– Утарсааччыларым бары идэлэрин баһылаабыт дьоһуннаах исписэлиистэр эбиттэр, мин кыранан чорбойон бастаатым. Былырыыҥҥы федеральнай күрэхтэһиигэ төрдүс миэстэни ылбытым, инньэ гынан холоһуохха сөп эбит диэммин, көрдөрүүбүн тупсарыахпын баҕаран, быйыл эмиэ кииристим. Онно билигин өссө кыһаллан бэлэмнэниэм.
Хаартыска: Тыа хаһаайыстыбатын уонна ас-үөл бэлиитикэтин пресс-киинэ.
-
0
-
0
-
0
-
0
-
0
-
0
