Пуоруму Федерация Сэбиэтэ итиэннэ Уһук Илини уонна Аартыканы сайыннарыы министиэристибэтэ Арассыыйа Федерациятын Хоту, Сибиир уонна Уһук Илин төрүт олохтоох аҕыйах ахсааннаах норуоттарын Ассоциациятын өйөбүлүнэн тэрийэллэр.
– Пуорум Норуоттар сомоҕолоһууларын сылыгар ыытыллар. Онон, пленарнай мунньах «Хоту түмэр: Арассыыйа норуоттарын сомоҕолоһуутугар дьахталлар оруоллара» диэн тиэмэнэн ыытыллара пуорум сыалын-соругун дьэҥкэтик көрдөрөр. Бары тэриллэр дьаһаллар норуоттар сомоҕолоһууларын, уопсастыба түмсүүтүн, дьахталлар бииргэ үлэлээһиннэрин боппуруостарыгар ананыаҕа, – диэн Федерация Сэбиэтин федеративнай тутулга, эрэгийиэннэрдээҕи бэлиитикэҕэ, олохтоох салайыныыга уонна Хоту дьыалатыгар кэмитиэтин бастакы солбуйааччы Галина Карелова иһитиннэрэр.
Кини этэринэн, пуорум бэбиэскэтэ хотугу эрэгийиэннэри сайыннарыы тыын суолталаах соруктарыгар сөп түбэһиннэрэн уонна кэлиҥҥи кэмҥэ ылыллыбыт докумуоннар сүрүн балаһыанньаларын, ол иһигэр 2030 сылга уонна кэлэр 2036 сылга диэри Уһук Илин демографияҕа бэлиитикэтин Стратегиятын учуоттаан оҥоһуллубут. Дьыалабыай бырагыраама түөрт стратегическай сиэссийэнэн үлэлиэхтээх. Ол курдук, бастакы сиэссийэ «Хоту түмэр: Арассыыйа норуоттарын сомоҕолоһуутугар дьахталлар оруоллара», иккис «Хоту уонна Уһук Илин социальнай-экэнэмиичэскэй сайдыыларыгар дьахталлар оруоллара», үһүс «Хотугу сир олохтоохторо социальнай өттүнэн туруктаах буолуулара: судаарыстыба бэлиитикэтин саҥа биринсиптэрэ», төрдүс «Доруобуйа харыстабылын стратегията Хотуну сайыннарыы сүрүн тосхоло» диэн тиэмэлэринэн үлэлиэхтэрэ.
Пуорумҥа парламеннар, тустаах министиэристибэлэр итиэннэ Арассыыйа 28 эрэгийиэниттэн дьокутаатар, төрүт олохтоох аҕыйах ахсаанар норуоттар, уопсастыбаннай тэрилтэлэр бэрэстэбиитэллэрэ, социальнай үлэһиттэр, учууталлар, урбаанньыттар, Тиихэй акыйааннааҕы, Хотугу уонна Балтикатааҕы флоттар байыаннай сулууспалаахтарын дьиэ кэргэттэрэ кыттыахтара.
– Хотугу эрэгийиэннэри сайыннарыы бастатан туран, тыйыс килиимэттээх, ураты уустук сиргэ олорор дьон олоҕун-дьаһаҕын хаачыстыбатын тупсарыы буолар. Онон пуорумҥа тирээн турар боппуруостары ырытан, тустаах быһаарыылары ылыныахпыт, ол иһигэр, көдьүүстээх хамсааһыны таһаарар сокуоннар көҕүлээһиннэрин оҥоруохпут. Дьыалабыай бырагыраама ити соруктарынан сирдэтэн оҥоһулунна. Хоту дьахталларын иккис пуорума идиэйэлэринэн уонна ылар быһаарыыларынан баай ис хоһоонноох буолуоҕар эрэнэбин, – диир сенатор.
Ил Түмэнтэн бу улахан тэрээһиҥҥэ төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэт бэрэссэдээтэлэ Елена Голомарева кыттыаҕа.
-
0
-
0
-
0
-
0
-
0
-
0
