Бастатан туран, суруналыыстар куорат баһылыгын дуоһунаһыттан уурайдаҕына, ханна үлэлии барарын, ким эрэ Анал байыаннай дьайыыга барар үһү диэбиттэрэ төһө кырдьыгын ыйыталастылар.
Сотору буолуохтаах астаапка туһунан ыйытыкка Евгений Григорьев киһи олоҕор хаһан баҕарар уларыйыы буоларын, онно холкутук сыһыаннаһар наадалааҕын бэлиэтээтэ.
«Сарсын ханна үлэлии барарбын олох көрдөрүө, Аҕа дойдум, дьон туһугар үлэлиэм, Саха Сиригэр, эбэтэр Арассыыйа атын эрэгийиэнигэр. Куорат баһылыгын дуоһунаһыгар биэс сыл анараа өттүгэр 2021 с. быыбарга «Биир ньыгыл Арассыыйа» баартыйаттан киирбитим, инникитин быыбарга кыттарым буоллар, бу эрэ баартыйаттан киириэм этэ. Мин кандидатурабын көрөллөрүгэр сайабылыанньабын, докумуоннарбын бу баартыйаҕа туттарбытым эрээри, баартыйа атыннык быһаарда. Ону хайдах баарынан ылынабын, 2026 с. атын хандьыдаат киириэҕэ», — диэтэ Евгений Григорьев. Кини Дьокуускай баһылыгынан үлэлиирэ аҕыйах хонук, уһаабыта ый кэриҥэ хаалбытын эттэ.
Пресс-кэмпириэнсийэҕэ мустубут суруналыыстар эдэр, эрчимнээх, чахчы эр киһилии сэбэрэлээх, олоҕун саамай үгэнигэр сылдьар баһылык өрөспүүбүлүкэ киин куората тупсарын, сайдарын туһугар элбэҕи оҥорбутун, норуокка чугаһын, дьоҥҥо аһаҕаһын туһунан истиҥ-иһирэх, махтал тылларын эттилэр.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
Ааптар хаартыскаҕа түһэриитэ.
-
15
-
2
-
1
-
0
-
2
-
1
