2026 с. «Дыгын оонньуутугар» хаһааҥҥытааҕар даҕаны киһини сөхтөрөр сыаналаах бириистэр оонньонон, устуоруйаҕа киирэр күрэхтэһии ыытылынна. Урут Николай Дьяконов, Иван Белолюбскай хас да сыл субуруччу «Дыгын оонньуутугар» бастыыр кэмнэригэр сыл ахсын УАЗ-ик массыына биэрээччилэр, оттон билигин бириистээх пуонда сыаната хас да төгүл үрдээн таҕыста. Уолаттар илин-кэлин түсүһэр, күрэс былдьаһар кэмнэригэр успуорт кэмэнтээтэрэ бириистээх пуонда 18 мөл. солк. диэбитигэр түрүбүүнэҕэ олорор дьон сөҕөн өрө уһуутуу түстүлэр.
Дьиктитэ диэн үбүлээһин кыаллыбакка сорох успуорт эбийиэктэрэ сабыллан, бүддьүөттэн үбүлэнэр бары бырагыраамалары сарбыйа турар, ОДьКХ салаатыгар миллиардынан үп-харчы тиийбэт кэмигэр маннык бириистэри оонньотуу туһунан хорсун быһыы, суоҕу баар оҥоруу, тэрийээччилэр чаҕылхай кыайыылара, үбүлээччи хампаанньалар тус көмөлөрө, бүтүн саха норуотун кэнэҕэс көлүөнэ кэпсээнигэр, уос номоҕор киирэр өрөгөйө!
Онон аҥаардас кыайыылаах бөҕөстөрү эрэ буолбакка, итиччэ сыаналаах бириистэри булбут, «Дыгын оонньуутун» өссө үрдүк таһымҥа күөрэтэн таһаарбыт, сүүрбүт-көппүт тэрийээччилэри эмиэ эҕэрдэлиэххэ сөп.
Бүддьүөккэ төһө даҕаны үп-харчы тиийбэт диэбиттэрин иһин, хастыы да мөлүйүөнүнэн сыаналаах бириистэри туруорар аныгы саха дьоно уйгу-быйаҥ, дэлэгэй олохтоох эбит, сахалар биһиги даҕаны баайдык-байылыаттык олоробут диэн киэн туттуох кэриҥнээхпит. «Дыгын оонньууларын» бириистэрин истэн атын омуктар, атын эрэгийиэн олохтоохторо саха норуотун өбүгэтин оонньуутун ытыктыы саныахтара, илии-атах, эт-сиин, өрө күүрэр былчыҥ кыаҕын тургутар күрэхтэһии суон сураҕа, албан аата сир-дойду аайы тарҕана, иһиллэ туруоҕа.
Ааптар хаартыскаҕа түһэриитэ.
-
0
-
0
-
0
-
0
-
0
-
0
