Бу сыллар тухары сүрүн салайааччылар -- Александр Жирков, Сергей Местников уонна тэрийэр хамыыһыйа чилиэннэрэ хаста да Кэбээйигэ тиийэн, тэрийии үлэлэрин торумнастылар. Ил Дархан Айсен Николаев Кэбээйи сиригэр бу бастакы улахан тэрээһини ыытарга аналлаах тэрийэр хамыыһыйа мунньаҕын үс төгүл ыытта. Олоҥхо Ыһыаҕа судаарыстыбыннай бырааһынньыктар истэригэр киирэр. Ыһыахха бэлэмнэнии хас биирдии Кэбээйи олохтооҕун баҕа санаатын норуот сомоҕолоһуутугар түмтэ. Хас биирдии Кэбээйи олохтооҕо дойдутун кэрэтин ыалдьыттарга көрдөрөр баҕатын, киэҥ, дириҥ ис хоһоонноох ис эйгэ култууратын Олонхо Ыһыаҕын нөҥүө көрдөрүө турдаҕа!
Кэбээйи улууһуттан төрүттээх олоҥхоһуттар Кырса Сөдүөт (Семенов Ф. С.), Кобяков Анисим Алексеевич, Бэс Дьөгүөссэтэ (Павлов Е. Г.), Ахта Көстөкүүн (Степанов Е. Р.), Хосхой (Петров Е. И.), Кычкин Игнатий Петрович, Чоруун (Кобяков И. С.), Хааппаан (Дьяконов И. П.), Куоҕас Уйбаан (Николаев И. А.), Хаҥас Хонооһой (Левин А. А.), Окойо (Павлов Н.Е.), Дьаргыл (Дьяконов Я. П.), Түөрээһин Дьөгүөр (Кобяков Е. Е.), Муотаан (Попов А. С.), Токур (Максимов И. И.), Адамсык (Софронеев И. И.) ааттара ааттанар айхаллаах күнэ үүннэ! Үс улуу өрүстэр Өлүөнэ, Алдан, Бүлүү силбэһиилэрэ үс төгүл кыахтаах дьон төрөөн-ууһаан олороллорун көрдөрөр. Кэбээйи улууһугар төрөөбүт үс улуу суруйааччылар: Николай Лугинов (саха), Андрей Кривошапкин (эбээн), Владимир Фёдоров (нуучча) «Саха Сирин норуодунай суруйааччыта» үрдүк ааты сүгэллэр. Айылҕаттан айдарыылаах, саха Ыһыаҕын арчылаан, арыаллаан үрдүк чыпчаалга таһаарбыт Эдьий Дуора аата Аар-саарга аатырар, саха норуотун кутун-сүрүн бөҕөргөтөр.
Бу сыллар тухары наука араас хайысхаларынан 17 дуоктара, 69 наука хандьыдаата дойдулара сайдарын туһугар билиилэрин-көрүүлэрин аныыллар. Ураты дьикти айылҕалаах үөрэх, билии биһиктээх кэрэ Кэбээйи! Хайдахтаах үөрүүнүй, бу күннэргэ «Дыгын оонньууларыгар», саха күүстээхтэрин улахан күрэстэригэр, бастакы уонна иккис миэстэлэри Кэбээйи ыччатттара: Лүксүгүнтэн төрүттээх Артем Дьяконов уонна Чагдаттан төрүттээх Яков Дмитриев ыланнар, Олоҥхо Ыһыаҕар бэлэх ууннулар!
Олоҥхо Ыһыаҕа саха норуотун ис-кут эйгэтин тутар, сайыннарар тулхадыйбат баайа. Бу кэнниттэн хаалар комплекстар кэлэр кэнэҕэски ыччаттарбыт бэйэлэрин норуоттарынан киэн тутталларын, бэйэлэрин кыахтарын омук быһыытынан сайыннаран аан дойду таһымыгар сүтэн-симэлийэн хаалбаттарыгар, саха омук былыр-былыргыттан илдьэ кэлбит баайа тылыгар, кини эпостарыгар буоларын көлүөнэттэн көлүөнэҕэ тиэрдии хас биирдии киһи ытык иэспит буолар. Улуус баһылыга Иван Левин, Кэбээйи олохтоохторо кырдьаҕаһыттан оҕотугар тиийэ ытык-мааны ыалдьыттары долгуйа күүтэллэр. Кэлэн иһэр ытык-мааны Олоҥхо Ыһыаҕынан эҕэрдэлээтэҕим буоллун! Үөрүү -көтүү үксээтин, дьол тосхойдун! Дом!
Норуот дьокутаата Елена Голомарева. 2026 сыл, бэс ыйын 30 күнэ.
-
0
-
1
-
0
-
0
-
0
-
0
