Аҕа саастаах дьоҥҥо дойду таһымыгар доруобуйа харыстабылыгар, социальнай көмүскэлгэ национальнай бырайыактар, өрөспүүбүлүкэҕэ эрэгийиэннээҕи бырагыраама баар. Ол чэрчитинэн ситэриилээх былаас, олохтоох салайыныы уорганнара үлэлииллэр. Аҕам саастаах дьоҥҥо гериатрия хайысхатынан мэдиссиинэ көмөтүн оҥороллор, социальнай өҥө көрүҥэ кэҥээн иһэр, киһи көрүүтүгэр наадыйар дьоҥҥо көмөлөһөллөр. Кэлиҥҥи кэмҥэ сааһырбыт дьоҥҥо өрөспүүбүлүкэ иһигэр социальнай туризмы сайыннараллар, сайыҥҥы сынньалаҥнарын тэрийэллэр.
2024 с. Алдан улууһугар Олимпийскай кыах оскуолатын баазатыгар «Үрүҥ көмүс каникул” тэрийбиттэр, ону көрөн атын улуустар эмиэ сайыҥҥы лааҕырдары арыйбыттар. Инникитин маннык уопуту бары улуустарга тарҕатыахтарын баҕараллар.
«Хас биирдии киһи төһө кыалларынан дьон көрүүтүгэр киирбэккэ этэҥҥэ сылдьыахтаах, онтон оннук түгэн тирээтэҕинэ, тустаах көмө оҥоһуллар. Киһи көрүүтүгэр наадыйар дьоҥҥо өр кэмнээх көрүүгэ пилотнай бырайыак үлэлиир, аймахтары өйүүргэ «Передышка» социальнай өҥө, чөлүгэр түһэрэр тэрили уларсар пуун баар, кырдьаҕас дьону хайдах көрөргө үөрэтэллэр. Соҕотох хаалбыт кырдьаҕастары көрөргө-истэргэ бу соторутааҕыта Маттаҕа социальнай-геронтологическай киин аһылынна», — диэтэ Елена Волкова.
Санатан эттэххэ, Дьокуускай куорат Уопсастыбаннай киинигэр «Алмаас саас» доруобай уонна көхтөөх уһун үйэлэниини көҕүлүүргэ пуорум ыытылынна, онно дьон олоҕун уһатарга, доруобуйаны чөлүгэр түһэрэргэ, сөбүлүүр дьарыктаах буолар наадатын туһунан араас идэлээх испиикэрдэр кэпсээтилэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
