Мунньах түмүгүнэн сайыҥҥы оттооһун уонна күһүҥҥү хомуур кэмигэр тыа хаһаайыстыбатын табаарын оҥорооччулары оттугунан-уматыгынан хааччыйарга биир кэлим бэрээдэги киллэрэр туһунан быһаарыы ылылынна. Методическай сүбэлэр бары улуустарга ыытыллыахтара. Тыа хаһаайыстыбатын уонна ас-үөл бэлиитикэтин министиэристибэтэ Кырасдааныскай оборуона дьыалатын уонна нэһилиэнньэ олоҕор-дьаһаҕар куттал суох буолуутун хааччыйыы министиэристибэтин кытары Ил Дархан Айсен Николаев сорудаҕынан оҥорбут докумуоннарыгар муниципалитеттар, толоруулаах былаас уорганнара уонна оттук-уматык хампаанньалара кэлим алгоритмынан бииргэ үлэлээһиннэрэ ыйыллар. Тыа хаһаайыстыбатын табаарын оҥорооччулар, ол иһигэр, кэтэх ыаллар, муниципальнай тэриллиилэр бигэргэппит чахчыларынан төһө уматыкка-оттукка наадыйалларын автозаправочнай ыстаансыйалартан ылар кыахтаннылар. Онуоха улуустар сирдэригэр-уоттарыгар үлэлиир оттук-уматык хампаанньалара бары тардыллыахтара, ити баар саппааһы муҥутуур көдьүүстээхтик туһанар кыаҕы биэриэҕэ.
Тыа хаһаайыстыбатын уонна ас-үөл бэлиитикэтин миниистирэ Артем Александров министиэристибэ хас биирдии улууһунан чахчылары чопчулааһыны түмүктээн эрэрин туһунан иһитиннэрдэ. Бас билии көрүҥүттэн тутулуга суох бары хаһаайыстыбалар оттукка-уматыкка наадыйыыларын кэлим кэрискэтэ оҥоһуллубут. Оттооһун суһал ыстааба төгүрүк суукка устата тиргиччи үлэлиир. Кэрискэҕэ 25 тыһыынча кэриҥэ субъект, ол иһигэр кэтэх ыаллар, 400 тыа хаһаайыстыбатын тэрилтэлэрэ уонна кэпэрэтииптэр, 2,5 тыһыынча бааһынай хаһаайыстыбалар киллэриллибиттэр. Олору таһынан олоҕу-дьаһаҕы хааччыйыы атын салаалара эмиэ көрүллэллэр, онуоха дьону тиэйэр-таһар сулууспалар, өрүһү туоратар паромнар үлэлэрэ итиэннэ хомунаалынай тэрилтэлэр чорботуллаллар.
--Биһиги бүгүҥҥү күҥҥэ сүрүн сорукпут сүөһү аһылыгын бэлэмниир кэмҥэ аграрийдары хааччыйыы буолар. Улуустары кытары күннэтэ сибээстэһэбит, кинилэр этиилэрин барытын көрөбүт, наада буоллаҕына, оттук-уматык хампаанньаларын кытары сөптөөх быһаарыылары ылабыт. Ону таһынан, ньиэп бородуукталарынан хаачыйыы уонна экэниэмикэ тутаах салаалара харыыта суох үлэлииллэрин хааччыйар инниттэн федеральнай былаас уорганнарын уонна ньиэп хампаанньалларын кытары ыкса үлэлиибит, – диэтэ Дмитрий Садовников. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Хаартыска: тустаах саайт, эрэдээксийэ пуондата.
-
0
-
0
-
0
-
0
-
0
-
2
