Мария Николаевна киин куорат боломуочуйатын кэҥэтэр туһунан сокуон ылыныллыаҕыттан, олохтоох бүддьүөккэ киирэр үп-харчы эбиллэн, араас эйгэҕэ үгүс-үтүмэн үлэ ыытыллыбытын бэлиэтээтэ. Кини тутааччылартан хомуллар үп туохха туттуллубутун, «наливайка» кистээн кыраадыстаах утаҕы атыылыыр кафелары хонтуруоллааһын уонна куоракка көхтөөх уһун үйэлэнии туһунан ыйыталаста.
Евгений Григорьев куорат бүддьүөтүгэр 20 мөл. солк. киирбитин, онон Глобальнай үөрэхтээһин киинин тутарга от ыйыгар бэдирээччити таларга куонкурус биллэриэхтээхтэрин, инфраструктурнай хомууртан киирэр үп-харчы үөрэх эбийиэктэрин тутууга барарын, ол нуорма-быраап аактатыгар сурулла сылдьарын чуолкайдаата.
«Сыана үрдүө диэбиттэрэ эрээри, урут даҕаны, билигин даҕаны Уһук Илиҥҥи ипэтиэкэ лимиитин быһыытынан олохтонор, 1 хостоох кыбартыыра 6 мөл. солк., 2 хостоох 9 мөл. солк. Тутааччылар социальнай эбийиэктэри тутарга харчы биэрэллэр, ити сөптөөх быһаарыныы.
Чөл олоҕу өрө тутууну ыччакка салгыы тарҕатыахтаахпыт, кыраадыстаах утах атыытын хааччахтыахтаахпыт.
Биир улахан бырайыагы оҥорбокко хааллым, куоракка Уһун үйэлэнии киинин, ол эрэн Мария Христофорова бу боппуруоһунан ситиһиилээхтик дьарыктанар. Куорат 400 000 тахса нэһилиэнньэлээх, дьон улуустан көһөн кэлэллэр, төрөппүттэрин, кырдьаҕастары аҕалаллар. Саҥа сиргэ көһөн кэлбит дьоҥҥо социальнай сибээс улахан суолталаах, ол иһигэр Уһун үйэлэнии киинин нөҥүө. Былаас уларыйарыттан тутулуга суох бу хайысханан үлэ салгыы барыахтаах», — диэн хоруйдаабыта Евгений Григорьев.
Ааптар хаартыскаҕа түһэриитэ.
-
0
-
0
-
0
-
0
-
0
-
0
