«Күн бүгүн 40 000 киһи хаарбах дьиэҕэ олорор. Куорат бэйэтин үбүнэн олохтоохтору барыларын көһөрөр кыаҕа суох, 80 млрд. солк. онно ирдэнэр. Дьон сылы-сыллаан кэтэһэ сатаан баран суукка үҥсэр, былырыын суут уурааҕын толорорго 600 мөл. солк. куорат бүддьүөтүттэн барбыта. Куорат салгыы сайдыаҕын хаарбах дьиэни көһөрүү атахтыыр.
Дьокуускай куоракка 2023 с. балаҕан ыйын 1 күнүгэр диэри хаарбах дьиэлэр испииһэктэригэр киирбит эргэ мас дьиэлэри барыларын дойду бэрэсидьиэнэ Владимир Путин сорудаҕынан 2030 с. диэри көһөртүөхтээхпит. 937 хаарбах дьиэни саахалланар туруктаах диэн билиммиппит. Федеральнай үбүлээһин көһүннэҕинэ, ити дьиэлэри көһөрүөхпүт, онтон хаалбыттары чааһынай тутааччылар көмөлөрүнэн, сири биир кэлим сайыннарыы бырагырааматынан көһөртүөххэ сөп. Бэрэсидьиэн сорудаҕын толорорго федеральнай, өрөспүүбүлүкэ, муниципальнай бүддьүөт кыттыгас үбүлээтэхтэринэ, ону олоххо киллэрэр кыах баар», — диэтэ Евгений Григорьев.
Куоракка 17 кыбаарталы, сиргэ тимирэн турар хаарбах мас дьиэлэри көтүрэн бүтэрэргэ, дойду бэрэсидьиэнин Владимир Путин сорудаҕын толорорго 4 сыл хаалла. Итиниэхэ 80 млрд. солк. ирдэнэр, оттон ити үп аҥаара «Олонхоленд» тутуутугар барда. Дьокуускай саҥа баһылыгын хамаандата бу соругу хайдах толорорун кэм-кэрдии көрдөрүө.
Ааптар хаартыскаҕа түһэриитэ.
-
0
-
0
-
0
-
0
-
0
-
0
