Сыһыыларга самыылара ласпайбыт, холлорун этэ хойдубут сыспай сиэллээхтэр астына- дуоһуйа хаамсаллар, хонууларга өҥнүүн- түүлүүн тупсубут хороҕор муостаахтар маҥыраһа ыҥырсан мусталлар, амтаһыйа- амтаһыйа астыналлар, ыстыы- ыстыы дуоһуйаллар. Көтөрдөр үөрдэрэ үксүүр, көппөтү көтүтэ үөрэтэллэр, бииргэ сылдьарга дьарыктыыллар, түмсэ үмүөрүһэллэр. Мэниги- тэниги дьарыйаллар, солуута суоҕу сабыта баттыыллар, ыраах айаҥҥа бэлэмнииллэр. Үгэһи тутуспуттарга, сиэрдээхтик сылдьыбыттарга, аһара барбатахтарга, иҥсэни кыаммыттарга Күөх Боллох көмүс хатырыктааҕынан күндүлүүр, сыалаах балыгын сыҥалыыр.Бэс ыйыгар сэргэхситэ сибэккилээбит от ыйыгар ситэн- хотон отон буолла, буһан ити диэкиттэн кытарчы көрдө, бу диэкиттэн көҕөрчү көрдө.
Амтанын ылбыт, сир ийэ күүһүн иҥэриммит эмтээх оттор хардыы аайы тэлгэннилэр, билэр- көрөр отоһуттар кэмиттэн кэмигэр сиппитин хомуйдулар, буспутун мустулар, хатаран- куурдан сэрэниин сэрэнэн мөһөөччүккэ чөмчөкөлөөтүлэр сөптөөх кэмҥэ диэри чөкө уурдулар, харыстыы- харамныы таҥаска суулаатылар, наадалаах түгэҥҥэ диэри антах диэки астылар. Астаах - үөллээх Аан Алахчын хотун сааскы кэмҥэ туттумахтаабыт хаһаастаахтары хайгыыр, сөптөөх түгэҥҥэ хамсанахтаабыт уурунуулаахтары уруйдуур. Эбиитин эбиискэ оҥостуҥ диирдии таба тайаммыттарга оҥоойуктарын толортуоҕа, ыаҕайаларын ыы быччары оҥоруо турдаҕа Сынньалаҥы өрөбүлү сөбүнэн көрөн кыстык бэлэмин түбүгэр түһүөххэйиҥ, сайыҥҥы түбүк кыстык кыһарҕаныттан быыһыа турдаҕа, томороон тымныыттан толлубат кыаҕы биэриэ буоллаҕа.
-
0
-
0
-
0
-
0
-
0
-
0
