Биллэн турар, дохуотуҥ онно сөп түбэһэр түгэнигэр, аҥаардас биэнсийэҕэ олордоххуна, күүлэйдии барыаҥ оннугар аскын-таҥаскын, хомунаалынай төлөбүргүн хааччынарыҥ даҕаны кэккэ уустуктардаах. Ол иһин биэнсийэҕэ тахсыбыт дьон бочуоттаах сынньалаҥнарыгар сынньаныахтарын оннугар үлэлээн букунайаллар. Онтон ол үлэҕиттэн уурайан хааллаххына, биир биэнсийэҕэ олорор күчүмэҕэй.
Кырдьар сааска харчыга ыктарбат туһугар атыыга-эргиэҥҥэ сатабыллаах, саҥаны саҕалыыртан толлубат дьон биир акылааттан үрдээбэт хамнастаах тэрилтэттэн уурайан, сөбүлүүр дьыалаларын арыйан, төһө дохуоту оҥороллорун бэйэлэрэ быһаараллар. Ыйга сүүһүнэн тыһыынчаны эргитэриҥ, эбэтэр туох эрэ сатамматаҕына, моҥкуруут барарыҥ барыта бэйэҥ эппиэтинэскэр киирэр.
Атыы-эргиэн сокуонун, урбаан быраабылатын, дьону угуйар ньыманы, юридическай өттүнэн быраап боппуруостарын билбэт киһи биирдэ урбаанньыт буолан хаалара уустук. Ол иһин урбааҥҥа кэлиэн баҕалаах дьону сирдииргэ өрөспүүбүлүкэҕэ доруобай уонна көхтөөх уһун үйэлэниини көҕүлүүр «Алмаас саас» бастакы пуорум иһинэн «Стартап 50+» төгүрүк остуол ыытылынна.
«Аврора» мэдиссиинэ клиникатын дириэктэрэ Николай Христофоров тэрилтэ ол иһигэр социальнай хайысхалаах урбаанынан дьарыктанарын, клиникаҕа 12 000 киһи сыһыарыллыбытын, Көхтөөх уһун үйэлэнии салаатыгар мэдиссиинэ уонна социальнай өҥө оҥоһулларын туһунан билиһиннэрдэ.
Көхтөөх уһун үйэлэнии киинэ 2021 с. аһыллан үлэлиир, ол кэм тухары 3000 аҕам саастаах дьону хабан, олох күһүнүн киэргэтэргэ, тупсарарга, сэргэхситэргэ, чэбдигирдэргэ киэҥ хайысхалаах үлэ ыытыллар. Биэнсийэҕэ тахсыбыт дьон сөбүлүүр дьарыктарын булан, эбии дохуот оҥостоллорун көҕүлүүргэ «Аврора» мэдиссиинэ клиниката уонна «Утум» уопсастыбаннай түмсүү бэйэлэрин идэлэрин дэгиттэр баһылаабыт, урбааҥҥа ситиһиилээх дьону төгүрүк остуолга испиикэр-эспиэр быһыытынан ыҥырда.
Төгүрүк остуол модератора Марина Богословская, СӨ Атыыга-эргиэҥҥэ, бырамыысыланнаска балаататын бэрэсидьиэнэ социальнай урбаан билигин болҕомто киинигэр тутулларын туһунан бэлиэтээтэ.
Ил Түмэн урбааҥҥа уонна туризмҥа сис кэмитиэтин бэрэссэдээтэлэ Алексей Корнилов биэнсийэҕэ тахсар саастара чугаһаабыт, эбэтэр номнуо биэнсийэлээх дьон төһөнөн өр үлэлии-хамсыы сылдьаллар, оччонон олохторо уһуурун туһунан эттэ.
«Күн бүгүн урбаанньыттары өйүүр көмө барыта федеральнай бүддьүөттэн, национальнай бырайыак нөҥүө оҥоһуллар. Үбүнэн-харчынан хааччыллыылаах атын эрэгийиэннэр оҥорор үлэлэрин хайысхата быдан киэҥ. Дьиэтээҕи, мэдиссиинэ, социальнай туризмы сайыннараллар, оттон биһиэхэ ол ситэ сайда илик», — диэтэ. Өрөспүүбүлүкэҕэ социальнай урбааны салгыы сайыннарыахха сөбүн, доруобуйаларынан хааччахтаах дьон дьарыктаах, дохуоттаах буолуохтаахтарын бэлиэтээтэ.
Ааптар хаартыскаҕа түһэриитэ.
-
0
-
0
-
0
-
0
-
0
-
0
